وفاقی وزیر برائے ریلوے محمد حنیف عباسی نے اعلان کیا ہے کہ عیدالاضحیٰ کے موقع پر پاکستان ریلوے عوام کی سہولت کے لیے پانچ خصوصی ٹرینیں چلائے گا، جبکہ عید کے تین دنوں کے دوران ٹرین کے کرایوں پر 20 فیصد رعایت دی جائے گی۔
میڈیا سے گفتگو کرتے ہوئے وفاقی وزیر نے کہا کہ پاکستان ریلوے نے گزشتہ 11 ماہ کے دوران شاندار کارکردگی دکھائی ہے، اور ادارے کی آمدنی 83 ارب روپے تک پہنچ گئی ہے۔ رواں مالی سال میں مسافر سروسز سے 42 ارب روپے کی کمائی ہوئی ہے۔
حنیف عباسی کے مطابق ریلوے ملازمین کی تنخواہیں محکمہ خود ادا کر رہا ہے، جو مالی طور پر ریلوے کے استحکام کی علامت ہے۔ انہوں نے کہا کہ ادارے کی کارکردگی میں مسلسل بہتری آ رہی ہے۔
رائل پام منصوبے کے بارے میں انہوں نے بتایا کہ وزیراعظم کی ہدایت پر یہ منصوبہ آؤٹ سورس کیا جا رہا ہے اور اس عمل میں مکمل شفافیت کو یقینی بنایا گیا ہے۔ تمام بڈز عوام کے سامنے کھولی جائیں گی تاکہ کسی قسم کے خدشات یا بداعتمادی کی گنجائش نہ رہے۔
مزید برآں، حنیف عباسی نے کہا کہ ریکوڈک منصوبے کی کامیابی کے لیے ریلوے کی اپ گریڈیشن ناگزیر ہے تاکہ ملک کی معیشت کو مستحکم کیا جا سکے۔
