پاکستان ریلوے نے کارگو ٹرین سروس کو جدید خطوط پر استوار کرنے کے لیے ایک جامع بزنس اور مارکیٹنگ پلان تیار کرنے کا فیصلہ کیا ہے۔ اس منصوبے کا مقصد ملکی تجارتی سرگرمیوں کو فروغ دینا اور آمدنی میں اضافہ ممکن بنانا ہے۔
پاکستان ریلوے نے کارگو آپریشن کو کامیاب بنانے کے لیے نجی شعبے کی شمولیت کے ساتھ ماہر کمپنیوں سے شراکت داری کی تجاویز طلب کی ہیں۔
کارگو ٹرین سروس کے لیے ایک مکمل بزنس ماڈل اور مارکیٹنگ پلان تیار کیا جائے گا تاکہ یہ سروس تجارتی حلقوں کی ضروریات کو پورا کر سکے۔
منصوبے کے تحت 5 سے 7 سال کا پائیدار فنانشل پلان بھی مرتب کیا جائے گا، جس میں ٹیکنالوجی، لاجسٹکس اور آپریشنل لاگت کو مدنظر رکھا جائے گا۔
اس نئی کارگو ٹرین سروس سے درآمدات و برآمدات کے شعبے کو سہولت میسر آئے گی اور ٹرکنگ پر انحصار کم ہوگا، جس سے ملک میں لاجسٹکس کے شعبے میں انقلاب آئے گا۔
حکومت اس منصوبے کو چین-پاکستان اقتصادی راہداری (CPEC) سے بھی منسلک کرنے کی خواہاں ہے تاکہ اسے بین الاقوامی سطح پر تجارتی روٹ کے طور پر متعارف کروایا جا سکے۔
پاکستان ریلوے کے اس اقدام سے نہ صرف ملکی معیشت کو تقویت ملے گی بلکہ بین الاقوامی سطح پر بھی پاکستان کی تجارتی سرگرمیوں میں اضافہ متوقع ہے۔
