پاکستان نے بنگلا دیش کے طلبہ کے لیے پانچ سال میں 500 اسکالرشپس اور 100 سول سرونٹس کی تربیت کے لیے نالج کوریڈور کا آغاز کیا۔
اسلام آباد، پاکستان نے بنگلا دیش کے طلبہ کے لیے “پاکستان۔بنگلادیش نالج کوریڈور” کا باقاعدہ آغاز کر دیا ہے، جس کے تحت پانچ سال میں 500 اسکالرشپس فراہم کی جائیں گی۔
ترجمان دفتر خارجہ کے مطابق ان اسکالرشپس میں سے ایک چوتھائی طب کے شعبے کے لیے مخصوص کی گئی ہیں تاکہ طلبہ اعلیٰ تعلیم کے ساتھ ساتھ مختلف پیشہ ورانہ شعبوں میں بھی مہارت حاصل کر سکیں۔ ترجمان نے مزید بتایا کہ پاکستان آئندہ پانچ برسوں میں 100 بنگلادیشی سول سرونٹس کو تربیت دینے کا بھی منصوبہ رکھتا ہے۔
پاکستان اور بنگلادیش کے درمیان 6 معاہدوں اور مفاہمتی یادداشتوں پر دستخط
اس سلسلے میں پاکستان نے پی ٹی اے پی (Pakistan Technical Assistance Program) کے تحت اسکالرشپس کی تعداد پانچ سے بڑھا کر پچیس کر دی ہے۔ یہ اقدام دونوں ممالک کے درمیان تعلیمی روابط کو مضبوط بنانے اور علاقائی تعاون کو فروغ دینے کے لیے اہم قدم قرار دیا گیا ہے۔
