اسلام آباد، وفاقی وزیر اطلاعات عطا تارڑ نے کہا ہے کہ پاکستان نے بھارتی جارحیت کا دندان شکن جواب دیا، لائن آف کنٹرول پر 40 سے 50 بھارتی فوجیوں کو ہلاک کیا گیا، جو ایک بڑی عسکری کامیابی ہے۔
وزیر اطلاعات نے پریس کانفرنس میں کہا کہ بھارت نے رات کی تاریکی میں بزدلانہ انداز میں پاکستان پر حملہ کیا، رافیل طیارے اور جدید ٹیکنالوجی کے استعمال کے باوجود دشمن کو ناکامی کا سامنا کرنا پڑا، ان کے بقول بھارت کا غرور ہمارے شاہینوں نے زمین بوس کر دیا۔
انہوں نے کہا کہ رافیل طیارے بنانے والی کمپنی کے شیئرز میں 18 فیصد کمی آئی ہے، بھارت جس انداز میں پاکستان کو نقصان پہنچانا چاہتا تھا، اس میں ناکام ہوا، اب دشمن اپنی حکمت عملی تبدیل کر چکا ہے اور مسلسل ڈرون حملوں کا سہارا لے رہا ہے۔
عطا تارڑ کا کہنا تھا کہ پاکستان نے 25 اسرائیلی ساختہ ڈرونز کو یا تو نشانہ بنا کر یا جیم کر کے مار گرایا ہے۔ ان کے مطابق ان ڈرونز کے ملبے کو قومی عجائب گھر میں محفوظ کیا جائے گا تاکہ عوام دشمن کی سازشوں کا مشاہدہ کر سکیں۔
انہوں نے کہا کہ بھارتی ہوائی حملوں سے سول آبادی کو نشانہ بنایا جا رہا ہے، جبکہ پاکستان نے صرف فوجی اہداف کو نشانہ بنایا ہے، وزیر اطلاعات کے مطابق پاکستان کی افواج نے مؤثر اور پیشہ ورانہ انداز میں دشمن کے عزائم کو ناکام بنایا۔
عطا تارڑ نے کہا کہ پاکستان نے سفارتی محاذ پر بھی بھارت کو شکست دی ہے، دنیا بھارت کی جارحیت کو نوٹس کر رہی ہے، قومی سلامتی کمیٹی نے افواج پاکستان کو بھرپور ردعمل کا اختیار دے دیا ہے اور اب فیصلہ پاکستان کے ہاتھ میں ہے کہ کب اور کیسے جواب دینا ہے۔
