پاکستان کی سیکرٹری خارجہ آمنہ بلوچ نے کہا ہے کہ پاکستان کسی بھی قسم کی مہم جوئی کا بھرپور جواب دینے کے لیے تیار ہے۔
اسلام آباد: پاکستان کی سیکرٹری خارجہ آمنہ بلوچ نے واضح کیا ہے کہ پاکستان اپنی خودمختاری اور سلامتی پر کوئی سمجھوتہ نہیں کرے گا اور کسی بھی قسم کی مہم جوئی کا منہ توڑ جواب دینے کے لیے مکمل طور پر تیار ہے۔
اسلام آباد میں تعینات مختلف ممالک کے سفیروں اور سفارتی نمائندوں کو بریفنگ دیتے ہوئے آمنہ بلوچ نے مقبوضہ کشمیر کے علاقے پہلگام میں پیش آنے والے حالیہ واقعے کے بعد خطے میں پیدا ہونے والی کشیدگی پر پاکستان کا موقف پیش کیا۔
انہوں نے بریفنگ کے دوران قومی سلامتی کمیٹی کے فیصلوں سے بھی آگاہ کیا اور واضح کیا کہ پاکستان بھارتی میڈیا اور حکام کی جانب سے عائد کیے جانے والے الزامات کو یکسر مسترد کرتا ہے۔
سیکرٹری خارجہ کا کہنا تھا کہ بھارت کی جانب سے بغیر کسی شواہد کے پاکستان کو واقعے سے جوڑنے کی کوشش نہ صرف غیر ذمہ دارانہ ہے بلکہ خطے میں امن و استحکام کے لیے بھی خطرہ بن سکتی ہے۔ انہوں نے کہا کہ پاکستان نے ہمیشہ دہشت گردی کی ہر شکل کی مذمت کی ہے اور اس حوالے سے عالمی برادری کے ساتھ مسلسل تعاون کیا ہے۔
آمنہ بلوچ نے سفارتی نمائندوں کو خبردار کیا کہ بھارت کی جانب سے کشیدگی بڑھانے کی کوششیں جاری ہیں، جنہیں نظرانداز نہیں کیا جا سکتا۔ ان کا کہنا تھا کہ پاکستان ایک ذمہ دار ریاست کے طور پر سفارتی ذرائع سے معاملے کے حل کو ترجیح دیتا ہے، تاہم اگر کسی نے بھی جارحیت کی کوشش کی تو اس کا بھرپور جواب دیا جائے گا۔
انہوں نے اس بات پر زور دیا کہ پاکستان علاقائی امن، استحکام اور تعاون کا حامی ہے، مگر اپنی سرحدوں کے دفاع کے لیے ہر حد تک جانے کا عزم رکھتا ہے۔
