پاکستان نے بھارت کے لیے فضائی حدود کی بندش میں مزید ایک ماہ کی توسیع کر دی ہے، جس کے بعد بھارتی طیارے 23 نومبر 2025 تک پاکستان کی فضائی حدود استعمال نہیں کر سکیں گے۔
ایکسپریس نیوز کے مطابق، پاکستان ایئرپورٹس اتھارٹی نے اس حوالے سے ایک نیا نوٹم (NOTAM) جاری کیا ہے۔ اس نوٹم کے مطابق، بندش کا اطلاق بھارتی مسافر اور جنگی طیاروں دونوں پر ہوگا، اور وہ پاکستان کی فضائی حدود سے گزرنے کے مجاز نہیں ہوں گے۔
یاد رہے کہ پاکستان نے بھارت کے لیے فضائی حدود کی بندش کا آغاز 23 اپریل 2025 سے کیا تھا۔ اس فیصلے کے بعد متعدد بھارتی پروازوں کو متبادل راستے اختیار کرنا پڑے، جس سے نہ صرف پروازوں کے دورانیے میں اضافہ ہوا بلکہ ایوی ایشن لاگت بھی متاثر ہوئی۔
ترکیہ نے اسرائیلی طیاروں کیلئے فضائی حدود بند کر دی، تمام تجارتی تعلقات منقطع
پاکستانی حکام کی جانب سے تاحال فضائی حدود کی بندش کی وجوہات کی تفصیل فراہم نہیں کی گئی، تاہم تجزیہ کار اسے علاقائی کشیدگی اور سفارتی تناؤ کا تسلسل قرار دے رہے ہیں۔
فضائی حدود کی اس پابندی کے باعث جنوبی ایشیا میں ہوائی نقل و حمل پر بھی اثرات مرتب ہو رہے ہیں، خاص طور پر ان پروازوں پر جو بھارت سے مغربی ممالک کی جانب جاتی ہیں اور عام طور پر پاکستانی فضائی حدود استعمال کرتی ہیں۔
