پاکستان کے دفترِ خارجہ نے انڈین فوج کے اس الزام کو مسترد کر دیا ہے جس میں کہا گیا تھا کہ پاکستان نے امرتسر میں واقع سکھوں کے مقدس مقام گولڈن ٹیمپل کو ڈرونز اور میزائلوں سے نشانہ بنانے کی کوشش کی۔
انڈین فوج نے دعویٰ کیا تھا کہ آٹھ مئی کو پاکستان کی جانب سے ایک حملے کی کوشش کی گئی جسے بروقت ناکام بنا دیا گیا۔ اس الزام پر ردعمل دیتے ہوئے دفتر خارجہ کے ترجمان نے 7 اور 8 مئی 2025 کی درمیانی شب کے واقعات پر بات کرتے ہوئے کہا کہ یہ الزام سراسر بے بنیاد اور حقائق کے منافی ہے۔
ترجمان کا کہنا تھا کہ: "پاکستان گولڈن ٹیمپل جیسے مقدس مقام کو نشانہ بنانے کا تصور بھی نہیں کر سکتا۔ ہم تمام مذاہب کے عبادت گاہوں کا احترام کرتے ہیں اور سکھ برادری کے جذبات کی قدر کرتے ہیں۔”
دفترِ خارجہ کے مطابق حقیقت یہ ہے کہ اسی دوران انڈیا کی جانب سے پاکستان کے اندر مختلف مذہبی مقامات کو نشانہ بنایا گیا، اور یہ الزامات دراصل انڈین کارروائیوں سے عالمی توجہ ہٹانے کی ایک کوشش ہیں۔
ترجمان نے مزید کہا کہ پاکستان سکھ مذہب کے کئی اہم مقامات کا میزبان ہے اور ہر سال ہزاروں سکھ یاتری پاکستان آتے ہیں۔ کرتارپور راہداری کے ذریعے سکھوں کو ویزا فری رسائی دی جاتی ہے، جو پاکستان کی مذہبی ہم آہنگی اور اقلیتوں کے احترام کی پالیسی کا ثبوت ہے۔ ایسے پس منظر میں گولڈن ٹیمپل کو نشانہ بنانے کا الزام نہ صرف غلط ہے بلکہ حقائق سے بھی مطابقت نہیں رکھتا۔
دوسری جانب انڈین فوج کے مطابق، ان کے پاس انٹیلیجنس اطلاعات تھیں کہ پاکستان، انڈین حملوں کے جواب میں مذہبی مقامات کو بھی نشانہ بنا سکتا ہے۔ انڈین 15 انفینٹری ڈویژن کے میجر جنرل کارتک سی شیشادری نے دعویٰ کیا کہ 7 مئی کو پاکستان میں مبینہ دہشتگردوں کے ٹھکانوں کو نشانہ بنانے سے قبل انڈیا نے ایئر ڈیفنس سسٹمز فعال کر دیے تھے اور گولڈن ٹیمپل کی حفاظت کے خصوصی اقدامات کیے گئے تھے۔
تاہم اس حوالے سے پاکستان نے مؤقف اختیار کیا ہے کہ اس طرح کے الزامات نہ صرف جھوٹے ہیں بلکہ علاقائی کشیدگی کو بڑھاوا دینے کے مترادف ہیں۔
پاکستان نے بھارت کے ان بے بنیاد دعوؤں کو سختی سے مسترد کیا جن میں امرتسر کے مقدس مقام پر حملے کا الزام لگایا گیا تھا — گولڈن ٹیمپل حملے کے بھارتی الزام پر پاکستان کا مؤقف یہاں ملاحظہ کریں۔
