15
کوئٹہ کے علاقے سریاب میں مبینہ طور پر مضر صحت آئسکریم کھانے سے 20 سے زائد بچوں کی حالت غیر ہوگئی۔
سول ہسپتال کوئٹہ کے ایم ایس ڈاکٹر عبدالہادی کے مطابق سریاب کے علاقوں کیچی بیگ، قمبرانی روڈ اور بشیر چوک سے بچوں کو بے ہوشی کی حالت میں لایا گیا۔
انہوں نے بتایا کہ ابتدائی طور پر شبہ ظاہر کیا جا رہا ہے کہ بچوں نے ایک ایسی آئسکریم کھائی جو مضر صحت تھی۔
ڈاکٹر عبدالہادی نے مزید کہا کہ 8 بچوں کو طبی امداد کے بعد گھر بھیج دیا گیا ہے جبکہ 12 بچے تاحال زیر علاج ہیں، تاہم کسی کی حالت تشویشناک نہیں ہے۔
دوسری جانب پولیس نے والدین کی اطلاع پر آئسکریم فروخت کرنے والے شخص کی تلاش شروع کردی ہے۔
