وزیراعلیٰ پنجاب مریم نواز نے کہا ہے کہ حکومت کا اصل مینڈیٹ عوام کی خدمت اور صوبے کی ترقی ہے، نہ کہ اڈیالہ جیل کے باہر بیٹھنا۔ گوجرانوالہ میں ماس ٹرانزٹ سسٹم کے سنگ بنیاد رکھنے کی تقریب سے خطاب کرتے ہوئے انہوں نے کہا کہ پنجاب میں ہر ترقیاتی منصوبے پر نواز شریف اور شہباز شریف کی مہر موجود ہے۔
انہوں نے کہا کہ نوا ز شریف کی میراث آج پنجاب میں جاری ہے اور گوجرانوالہ میں ماس ٹرانزٹ کا کام آج سے شروع ہو رہا ہے۔ وزیراعظم کے گوجرانوالہ آنے پر ان کا شکریہ ادا کرتے ہوئے مریم نواز نے کہا کہ پنجاب میں ترقیاتی منصوبے نواز شریف کے ویژن سے متاثر ہو کر شروع کیے گئے ہیں، اور چند دنوں میں فیصل آباد میں میٹرو منصوبے کا آغاز کیا جائے گا۔
وزیراعلیٰ نے کہا کہ پاکستان کی معیشت ڈیفالٹ کے خطرے سے نکل کر مستحکم ہو رہی ہے اور مہنگائی میں کمی کے اقدامات کامیاب ہو رہے ہیں۔ انہوں نے بتایا کہ پنجاب میں مہنگائی 40 فیصد سے کم ہو کر 4 فیصد تک پہنچ گئی ہے، جبکہ سی پیک، میٹرو بس، اورنج لائن، تعلیم اور ٹیکنالوجی کے شعبوں میں ترقی جاری ہے۔
مریم نواز نے کہا کہ میانوالی اور گجرات میں بنیادی ترقیاتی منصوبے تیزی سے جاری ہیں اور صوبے کے مختلف علاقوں میں بارش کے پانی کے مسائل حل کیے جا رہے ہیں۔ سڑکیں، گرین لائن منصوبے، ماڈل ویلجز اور سیوریج منصوبے پنجاب بھر میں جاری ہیں۔
پاکستان کا ماضی، حال اور مستقبل نواز شریف ہیں، مریم نواز کا دعویٰ
انہوں نے خیبر پختونخوا میں حکومت کی کارکردگی پر بھی تنقید کی اور کہا کہ وہاں 12 سال سے عوام کی ترقی کے لیے کوئی اقدامات نہیں ہوئے۔ وزیراعلیٰ نے مشورہ دیا کہ خیبر پختونخوا کے حکام اڈیالہ جیل کے باہر بیٹھنے کی بجائے عوام کی خدمت اور صوبے کی ترقی پر توجہ دیں۔
مریم نواز نے بتایا کہ پنجاب میں اپنی چھت اپنا گھر پروگرام کے تحت ایک لاکھ گھر زیر تعمیر ہیں اور ہزاروں گھر مکمل ہو چکے ہیں۔ ستھرا پنجاب پروگرام کے تحت کوڑا کرکٹے کی صفائی کے کام تیزی سے جاری ہیں، جبکہ صوبے میں سیوریج اور صاف پانی کے نئے منصوبے بھی نافذ کیے جا رہے ہیں۔ انہوں نے کہا کہ ایک سال میں 20 ہزار کلومیٹر اور دو سال میں 30 ہزار کلومیٹر سڑکیں مکمل کی جائیں گی۔
