اپوزیشن اتحاد نے 27 ویں ترمیم کے خلاف تحریک چلانے اور پارلیمنٹ نہ چلنے دینے کا اعلان کر دیا

اسلام آباد: اپوزیشن اتحاد تحریک تحفظ آئین پاکستان نے 27 ویں آئینی ترمیم کے خلاف احتجاجی تحریک شروع کرنے کا اعلان کیا ہے۔

اسلام آباد میں پریس کانفرنس کے دوران چیئرمین تحریک محمود اچکزئی نے کہا کہ آج سے تحریک شروع ہو رہی ہے اور رات ساڑھے آٹھ بجے سے نعرے بلند کیے جائیں گے۔ آج کا نعرہ ہوگا: "ایسے دستور کو ہم نہیں مانتے”۔

مشترکہ پریس کانفرنس میں مصطفیٰ نواز کھوکھر نے کہا کہ 27 ویں ترمیم اشرافیہ کے مفادات کے لیے کی گئی ہے اور آئین کا تعلق کسی شخصیت سے نہیں ہوتا۔ انہوں نے کہا کہ آئین میں ترامیم کو عوامی مفاد کے بجائے ذاتی مفادات کے لیے استعمال کیا جا رہا ہے۔

سینیٹر راجہ ناصر عباس نے کہا کہ پارلیمنٹ اور عدلیہ کو تباہ کیا جا رہا ہے اور ملک کو خطرناک صورتحال کی طرف لے جایا جا رہا ہے۔ انہوں نے کہا کہ اس ترمیم کو روکنے کے لیے ہر حد تک جائیں گے۔