وزارت داخلہ نے تحریک لبیک پاکستان (ٹی ایل پی) پر پابندی کا نوٹیفکیشن جاری کر دیا ہے، جس کے بعد جماعت کو قانونی طور پر کالعدم قرار دے دیا گیا ہے۔
وفاقی کابینہ نے گزشتہ روز ٹی ایل پی پر پابندی کی منظوری دی تھی۔
نوٹیفکیشن میں کہا گیا ہے کہ حکومت کے پاس ٹھوس وجوہات ہیں کہ ٹی ایل پی دہشتگرد سرگرمیوں میں ملوث ہے، اور انسداد دہشت گردی ایکٹ 1997 کے تحت اسے فرسٹ شیڈول میں شامل کر دیا گیا ہے۔ پابندی کا نوٹیفکیشن امیر ٹی ایل پی اور متعلقہ اداروں کو بھی بھیج دیا گیا ہے۔
وفاقی کابینہ نے ٹی ایل پی پر پابندی کی منظوری دے دی
ذرائع کے مطابق وزارت قانون نے بھی قانونی کارروائی شروع کر دی ہے اور اٹارنی جنرل کی مشاورت کے بعد سپریم کورٹ میں ریفرنس دائر کیا جائے گا۔ آئین کے آرٹیکل 17 کی شق 2 اور 3 کے تحت سپریم کورٹ شواہد کا جائزہ لینے کے بعد حتمی فیصلہ کرے گی۔
سپریم کورٹ کے فیصلے کے بعد ہی پابندی کا مکمل اطلاق ہوگا۔ یاد رہے کہ چند روز قبل پنجاب کابینہ نے بھی ٹی ایل پی پر پابندی کی منظوری دی اور سمری وفاقی حکومت کو بھیجی تھی۔
