پاور ڈویژن نے حالیہ دنوں میں گردش کرنے والی اس خبر کی سختی سے تردید کی ہے جس میں دعویٰ کیا گیا تھا کہ رہائشی مقامات پر بجلی کے دو میٹر لگانے پر پابندی عائد کر دی گئی ہے، ترجمان پاور ڈویژن کا کہنا ہے کہ یہ خبر سراسر غلط، بے بنیاد اور عوام کو گمراہ کرنے کی ایک مذموم کوشش ہے۔
ترجمان کے مطابق ایسی جھوٹی خبریں نہ صرف عوام میں بے چینی پیدا کرتی ہیں بلکہ پیکا ایکٹ کے تحت یہ قابلِ سزا جرم بھی ہے، پاور ڈویژن نے واضح کیا کہ آج بھی مروجہ قوانین کے تحت رہائشی مقامات پر دوسرا بجلی کا میٹر حاصل کیا جا سکتا ہے، بشرطیکہ وہ جگہ علیحدہ پورشن، علیحدہ داخلی راستہ، سرکٹ اور کچن پر مشتمل ہو۔
بیان میں مزید کہا گیا کہ بجلی کے ناجائز استعمال اور سبسڈی کے غلط استعمال کو روکنے کے لیے پہلے سے ہی قانونی طریقہ کار موجود ہے اور یہ مکمل طور پر نافذ العمل ہے۔
ترجمان نے عوام سے اپیل کی کہ بجلی کے درست اور شفاف استعمال کے لیے متعلقہ ڈسٹری بیوشن کمپنیوں سے مکمل تعاون کریں اور غیر مصدقہ خبروں سے گریز کریں۔
یاد رہے کہ سوشل میڈیا پر چند صارفین کی جانب سے یہ افواہ پھیلائی جا رہی تھی کہ حکومت نے رہائشی علاقوں میں دوسرے بجلی میٹر کے اجرا پر مکمل پابندی لگا دی ہے، جس پر پاور ڈویژن نے فوری ردعمل دیتے ہوئے حقیقت واضح کر دی۔
