کراچی: کے ایم سی نے نیپا فلائی اوور کے قریب کھلے مین ہول میں گر کر جاں بحق ہونے والے بچے کے واقعے کا ذمہ دار بی آر ٹی تعمیرات اور نجی اسٹور انتظامیہ کو قرار دے دیا ہے۔
گلشن اقبال ٹاؤن میں پیش آنے والے حادثے سے متعلق تحقیقاتی رپورٹ سیکرٹری محکمہ بلدیات کو بھجوائی گئی ہے۔ سینئر ڈائریکٹر میونسپل سروسز عمران راجپوت کی رپورٹ میں کہا گیا کہ میئر کراچی کے حکم پر بچے کی تلاش کا آپریشن شروع کیا گیا اور گلشن ٹاؤن کے لنک نالے سے بچے کی لاش برآمد ہوئی۔
رپورٹ میں کہا گیا کہ حادثے کی وجہ بی آر ٹی تعمیرات ہیں، جس کی کھدائی کے باعث نالے کے پورے نکاسی کے نظام کو شدید نقصان پہنچا۔ عارضی دو فٹ کے کور لگا کر گٹروں کو بند کرنے کی کوشش کی گئی، لیکن یہ ناکافی ثابت ہوا۔
بلدیہ مواچھ گوٹھ میں کھلے مین ہول میں گر کر3 سالہ بچہ جاں بحق
تحقیقاتی رپورٹ کے مطابق، ریڈ لائن منصوبے کے تحت ایک جگہ مین ہول کھلا رہنے کی وجہ سے سانحہ ہوا، اور یہ طریقہ کار یا غیر معیاری ڈھکن کبھی کے ایم سی نے استعمال نہیں کیے۔ بی آر ٹی نے کام شروع کرنے سے پہلے کے ایم سی کو آگاہ نہیں کیا، اور کھدائی کے بعد صورتحال کو نظر انداز کیا گیا۔
کے ایم سی کی رپورٹ میں یہ بھی کہا گیا کہ نجی اسٹور انتظامیہ اور بی آر ٹی کی مشترکہ غفلت کی وجہ سے بچہ گٹر میں گرا، اور بعد میں افسران کی نگرانی میں کھدائی شدہ تمام حصے بھر دیے گئے۔
