13
کراچی: سندھ ہائی کورٹ نے 11 بچوں کے والد مولانا عبدالبشر کو شناختی کارڈ جاری کرنے میں تاخیر پر نادرا کے اسسٹنٹ ڈائریکٹر ویریفکیشن کے خلاف قابل ضمانت وارنٹ گرفتاری جاری کر دیے ہیں۔
عدالت میں مولانا عبدالبشر کی جانب سے موقف اختیار کیا گیا کہ 2004 سے شناختی کارڈ کے اجرا کے لیے نادرا دفاتر کے چکر لگانے کے باوجود ان کے بچوں کے شناختی کارڈز جاری نہیں کیے جا رہے، جس کی وجہ سے بچوں کی تعلیم متاثر ہو رہی ہے۔
جسٹس محمد اقبال کلہوڑو نے نادرا حکام کی کارکردگی پر شدید برہمی کا اظہار کرتے ہوئے سوال کیا کہ اگر تمام ضروری دستاویزات موجود ہیں تو شناختی کارڈ کیوں جاری نہیں کیا جا رہا۔ عدالت نے کہا کہ نادرا نے تو بچوں کو پیدائشی سرٹیفکیٹ جاری کر دیے ہیں، اس لیے شناختی کارڈ روکنے کی کوئی جواز نہیں بنتا۔
عدالت نے نادرا کے اسسٹنٹ ڈائریکٹر ویریفکیشن کے خلاف وارنٹ گرفتاری جاری کرتے ہوئے سماعت ایک ہفتے کے لیے ملتوی کر دی۔ درخواست گزار نے عدالت کو بتایا کہ شناختی کارڈ کی عدم دستیابی کے باعث ان کے 11 بچوں کی تعلیم کو شدید نقصان پہنچ رہا ہے۔
