پشاور ، مسلم لیگ (ن) نے پشاور سے پارٹی میں حال ہی میں شمولیت اختیار کرنے والی ثمربلور کو قومی اسمبلی کا رکن بنانے کا فیصلہ کر لیا ہے ، اس فیصلے کی تصدیق وزیراعظم کے کوآرڈی نیٹر برائے اطلاعات و نشریات اختیار ولی نے کرتے ہوئے کہا کہ ثمربلور کو قومی اسمبلی کی ایک نشست دی جائے گی، جب کہ دوسری نشست ایم پی اے جمشید مہمند کی اہلیہ کے حصے میں آئے گی۔
ثمربلور کا تعلق خیبرپختونخوا کے ممتاز سیاسی بلور خاندان سے ہے، جو ماضی میں عوامی نیشنل پارٹی (اے این پی) کی پہچان رہا ہے۔ ان کی مسلم لیگ (ن) میں شمولیت کو سیاسی حلقوں میں خاصی اہمیت دی جا رہی ہے ، کیونکہ یہ نہ صرف پشاور بلکہ پورے خیبرپختونخوا میں ن لیگ کے لیے سیاسی اثر و رسوخ بڑھانے کی کوششوں کا حصہ ہے۔
ثمربلور نے حالیہ دنوں میں وزیراعظم شہباز شریف سے اسلام آباد میں ملاقات کی تھی، جس کے دوران انہوں نے باضابطہ طور پر مسلم لیگ (ن) میں شمولیت کا اعلان کیا۔ ان کے فیصلے کو ایک بڑی سیاسی پیش رفت قرار دیا جا رہا ہے، کیونکہ بلور خاندان طویل عرصے تک اے این پی کا وفادار رہا ہے اور ان کا جھکاؤ ن لیگ کی طرف جانا کئی سیاسی صف بندیاں متاثر کر سکتا ہے۔
اختیار ولی کے مطابق پارٹی اعلیٰ قیادت نے ثمربلور کی سیاسی خدمات اور پشاور میں اثر و رسوخ کو مدنظر رکھتے ہوئے انہیں قومی اسمبلی میں نمائندگی دینے کا فیصلہ کیا ہے۔ اس اقدام سے ن لیگ کو خیبرپختونخوا میں اپنی سیاسی موجودگی مضبوط کرنے میں مدد ملے گی۔
یاد رہے کہ بلور خاندان کا شمار خیبرپختونخوا کی سیاست میں قدآور خاندانوں میں ہوتا ہے، جنہوں نے کئی دہائیوں تک اے این پی کے پلیٹ فارم سے سیاست کی ہے۔ ثمربلور کی ن لیگ میں شمولیت اس تسلسل میں بڑی تبدیلی سمجھی جا رہی ہے۔
