اپوزیشن اتحاد تحریک تحفظ آئین پاکستان کے رہنما مصطفیٰ نواز کھوکھر نے ضمنی انتخابات اور حکومتی اقدامات پر تشویش کا اظہار کرتے ہوئے کہا ہے کہ حکومت جس طرح نظام چلا رہی ہے، عالمی مالیاتی ادارے (آئی ایم ایف) نے بیچ چوراہے بھانڈا پھوڑ دیا ہے۔
تحریک تحفظ آئین پاکستان کے رہنماؤں نے پریس کانفرنس میں بتایا کہ ملک میں آئین، قانون اور عدلیہ کی اہمیت تقریباً ختم ہوچکی ہے، اور ضمنی انتخابات میں ہونے والے حالات سب کے سامنے ہیں۔ انہوں نے کہا کہ پاکستانی عوام سے ووٹ کا حق چھیننے کا عمل جاری ہے۔
مصطفیٰ نواز کھوکھر نے کہا کہ جس ملک میں 5 سے 6 ہزار ارب روپے کی کرپشن ہو، وہاں نظام کس حال میں ہوگا، آئی ایم ایف نے اس حقیقت کو سب کے سامنے رکھ دیا ہے۔ انہوں نے آزاد کشمیر کی صورتحال پر بھی تشویش ظاہر کی اور کہا کہ عوام کو سیاسی کھیل میں دھکیلنے سے باز رہیں۔
انہوں نے مزید کہا کہ بانی پی ٹی آئی اس وقت سیاسی مقبول ترین لیڈر ہیں، لیکن ملک میں غیر یقینی صورتحال اور قانون کی کتابوں کی وقعت ختم ہوگئی ہے۔ انہوں نے حکومت سے مطالبہ کیا کہ ملک کو امن کی طرف لے جائیں۔
پاکستان تحریک انصاف (پی ٹی آئی) کے رہنما تیمور جھگڑا نے کہا کہ اقوام متحدہ کے کمشنر برائے انسانی حقوق نے اپنی رپورٹ میں عدلیہ کی آزادی پر حیرانی اور تشویش کا اظہار کیا ہے۔ انہوں نے ضمنی انتخابات کے نتائج پر سوال اٹھاتے ہوئے کہا کہ شفافیت کو شدید نقصان پہنچا ہے، فارم 45، 46 اور 47 نہ ریلیز ہوئے اور نہ ای سی پی کی ویب سائٹ پر اپ لوڈ ہوئے۔
تیمور جھگڑا نے کہا کہ ہم ایسا الیکشن چاہتے ہیں جس میں ووٹ ڈالنے والے کا ووٹ حقیقی طور پر شمار ہو، لیکن موجودہ صورتحال میں اربوں روپے ضائع ہو رہے ہیں اور ملک میں شفافیت کا فقدان ہے۔
