صوبائی محتسب نے مونس علوی کو عہدے سے ہٹانے اور 25 لاکھ روپے جرمانے کا حکم دے دیا، فیصلہ صارف کی شکایت پر سنایا گیا۔
کراچی سے تعلق رکھنے والی رہائشی مہرین زہرہ کی درخواست پر صوبائی محتسب نے ایک بڑا فیصلہ سنا دیا، جس کے تحت کے الیکٹرک کے چیف ایگزیکٹو آفیسر (سی ای او) سید مونس عبداللہ علوی کو عہدے سے ہٹانے اور پچیس لاکھ روپے جرمانہ عائد کرنے کے احکامات جاری کیے گئے ہیں۔
محتسب کے مطابق، مونس علوی پر لگایا گیا الزام ثابت ہو گیا ہے، جس کی بنیاد پر یہ کارروائی کی گئی ہے۔
اس فیصلے کے بعد کے الیکٹرک کی اعلیٰ انتظامیہ ایک نئی صورتحال سے دوچار ہو گئی ہے، کیونکہ مونس علوی کو محض اسی ماہ دوبارہ سی ای او کے عہدے پر تعینات کیا گیا تھا۔ ادارے کی جانب سے جاری کردہ پریس ریلیز میں بتایا گیا تھا کہ بورڈ آف ڈائریکٹرز نے 7 جولائی کے اجلاس میں انہیں 30 جولائی 2025 سے سی ای او کے طور پر دوبارہ تعینات کرنے کا فیصلہ کیا تھا۔
یاد رہے کہ مونس علوی 2008 سے کے الیکٹرک سے وابستہ ہیں اور وہ اس دوران مختلف اہم عہدوں پر فائز رہے ہیں، جن میں چیف فنانشل آفیسر، کمپنی سیکرٹری اور ہیڈ آف ٹریژری شامل ہیں۔ ان کے طویل تجربے اور کمپنی میں گہرے روابط کے باوجود، صوبائی محتسب کا یہ فیصلہ ایک نمایاں پیش رفت کے طور پر دیکھا جا رہا ہے۔
یاد رہے کہ کے الیکٹرک پاکستان کی سب سے بڑی نجی پاور یوٹیلیٹی کمپنی ہے، جسے ماضی میں بھی صارفین کی شکایات، لوڈشیڈنگ اور بلنگ مسائل کے باعث سخت تنقید کا سامنا رہا ہے۔ مونس علوی کی دوبارہ تقرری کے بعد یہ فیصلہ کمپنی کی انتظامیہ پر عوامی اعتماد کے حوالے سے ایک اور چیلنج بن کر سامنے آیا ہے۔
