بابوسر ٹاپ کے قریب لاپتہ سیاح بحفاظت مل گئے، گلگت بلتستان حکومت نے احتیاطی تدابیر کی اپیل کر دی۔
گلگت بلتستان کے دشوار گزار علاقے بابوسر ٹاپ کے قریب دو روز سے لاپتہ ہونے والے سیاحوں کو گلگت بلتستان پولیس اور ریسکیو ٹیم نے کامیاب سرچ آپریشن کے بعد بحفاظت تلاش کر لیا۔ سیاحوں کی گاڑی راستے میں خراب ہو گئی تھی، جس کے باعث ان سے گزشتہ 48 گھنٹوں سے کوئی رابطہ ممکن نہ تھا۔
ترجمان گلگت بلتستان حکومت فیض اللہ فراق کے مطابق سیاحوں کی گمشدگی کی اطلاع ملنے پر فوری کارروائی عمل میں لائی گئی، اور سی سی ٹی وی فوٹیج سمیت جدید ذرائع کا استعمال کرتے ہوئے سرچ آپریشن کیا گیا۔ سیاحوں کو بابوسر ٹاپ کے نزدیک ان کی خراب گاڑی کے پاس سے بازیاب کیا گیا، جنہوں نے ریسکیو کے بعد حکومت، پولیس اور امدادی اداروں کا شکریہ ادا کیا۔
ترجمان نے سیاحوں پر زور دیا کہ وہ گلگت بلتستان میں داخلے کے وقت چیک پوسٹوں پر اپنی گاڑیوں کی لازمی رجسٹریشن کروائیں تاکہ کسی بھی ایمرجنسی کی صورت میں ان کا فوری سراغ لگایا جا سکے۔ ساتھ ہی یہ بھی اپیل کی گئی کہ سیاح اپنی لوکیشن کے بارے میں کنٹرول روم اور اہل خانہ کو باقاعدگی سے آگاہ رکھیں۔
فیض اللہ فراق نے مزید کہا کہ خراب موسم یا دشوار گزار علاقوں کی طرف جانے سے گریز کیا جائے، کیونکہ معمولی لاپرواہی بڑی مشکل کا سبب بن سکتی ہے۔
یاد رہے کہ گلگت بلتستان پاکستان کا سیاحتی جنت تصور کیا جاتا ہے، تاہم یہاں کے پہاڑی راستے اور غیر متوقع موسمی حالات سیاحوں سے مکمل احتیاط کا تقاضا کرتے ہیں۔ حالیہ واقعہ ایک بار پھر اس امر کی یاد دہانی ہے کہ مناسب تیاری اور احتیاطی تدابیر سے جان و مال کے نقصان سے بچا جا سکتا ہے۔
