اسلام آباد: وزیر مملکت برائے قانون، بیرسٹر عقیل ملک نے کہا ہے کہ پاکستان تحریک انصاف (پی ٹی آئی) سیاسی نوعیت کی ملاقات کرنا چاہتی ہے، اور بانی پی ٹی آئی عمران خان کی فیملی ان سے ملاقات میں سیاسی امور پر ہی بات کرتی ہے۔
جیو نیوز کے پروگرام "آج شاہ زیب خانزادہ کے ساتھ” میں گفتگو کرتے ہوئے بیرسٹر عقیل ملک نے واضح کیا کہ کسی کی خواہشات کے مطابق ملاقات نہیں کرائی جا سکتی، ملاقات کا اختیار جیل سپرنٹنڈنٹ کے پاس ہے اور یہ جیل مینول کے مطابق ہوتی ہے۔ انہوں نے مزید کہا کہ ملاقاتیں پریزن رولز کے تحت کی جاتی ہیں، اور پی ٹی آئی سیاسی نوعیت کی ملاقات کرنا چاہتی ہے۔
انہوں نے مثال دیتے ہوئے کہا کہ شاہد خاقان عباسی کو 9 ماہ تک کسی سے ملاقات کی اجازت نہیں دی گئی تھی، جبکہ نوازشریف کی تین ہفتوں تک کسی سے ملاقات نہیں کرائی گئی تھی، اور نوازشریف کے وقت ملاقات میں کوئی سیاسی بات نہیں ہوتی تھی۔
بیرسٹر عقیل ملک نے کہا کہ جب جیل سپرنٹنڈنٹ کہہ رہا ہے کہ بانی پی ٹی آئی بالکل ٹھیک ہیں، تو یاد رہے کہ اڈیالا جیل میں صرف قیدی نمبر 804 نہیں بلکہ دیگر قیدی بھی موجود ہیں۔ انتظامیہ سب کی سکیورٹی کو مدنظر رکھتی ہے، اور آئندہ منگل کو سکیورٹی صورتحال کے مطابق ملاقات کی اجازت دی جا سکتی ہے۔ امکان ہے کہ سکیورٹی کے پیش نظر ملاقات میں ایک بہن یا وکیل شامل ہو۔
عقیل ملک نے کہا کہ بانی پی ٹی آئی کی فیملی ان سے ملاقات میں سیاسی امور پر بات کرتی ہے، اور احتجاج قانون و آئین کے دائرے میں کیا جا سکتا ہے، جس پر کسی نے پابندی نہیں لگائی۔ حکومت شہریوں کی حفاظت کے لیے تمام اقدامات کرے گی۔
انہوں نے مزید وضاحت کی کہ بانی پی ٹی آئی کی ان کی بہنوں اور وکلا سے ملاقاتیں ہوتی رہی ہیں، اور ان کے بیٹوں سے بھی بات چیت جاری ہے، تاہم بانی پی ٹی آئی کے بیٹے پاکستان آنے کے لیے تیار نہیں ہیں۔
عقیل ملک نے کہا کہ بانی پی ٹی آئی کو واٹس کالز کی سہولت بھی موجود رہی ہے، جبکہ اڈیالا جیل میں کسی قیدی کو واٹس ایپ کال کی سہولت میسر نہیں۔ اگر عدالت حکم دے گی تو بانی پی ٹی آئی کے بیٹوں سے کال پر بات کرائی جائے گی، تاہم سپرنٹنڈنٹ جیل خود اس کال کو یقینی نہیں بنا سکتا، کیونکہ سپرنٹنڈنٹ کا اختیار محدود ہے۔
