ملک میں امن و سکون نام کی کوئی چیز نہیں، زندگی کو خطرات لاحق ہیں: مولانا فضل الرحمٰن

جمعیت علمائے اسلام (جے یو آئی ف) کے سربراہ مولانا فضل الرحمٰن نے کہا ہے کہ ملک میں امن و سکون کا کوئی وجود نہیں اور زندگی کو مختلف خطرات لاحق ہیں۔

انہوں نے موجودہ حکومت کی کارکردگی پر شدید تنقید کرتے ہوئے کہا کہ اگرچہ پی ٹی آئی حکومت سے گلہ تھا، لیکن موجودہ حکومت نے بھی ملکی پالیسیوں میں کوئی مثبت تبدیلی نہیں کی۔

پشاور میں خیبر پختون خوا کی مجلسِ عمومی کے اجلاس سے خطاب کرتے ہوئے مولانا فضل الرحمٰن نے کہا کہ بین الاقوامی مفادات کو فروغ دیا جا رہا ہے اور پاکستان کے معاشی راستے کو روکنے کی کوشش کی جا رہی ہے۔ انہوں نے صوبائی حکومت کی کارکردگی کو بھی تنقید کا نشانہ بناتے ہوئے کہا کہ یہاں بیڈ گورننس نہیں بلکہ مس گورننس ہے۔

جے یو آئی کے سربراہ نے مزید کہا کہ ملک میں کرپشن کا بازار نہیں بلکہ مارکیٹ گرم ہے اور اس حکومت کی سرپرستی کرنے والے بھی صوبے کو تباہ کرنے میں برابر کے شریک ہیں۔