وزیراعلیٰ پنجاب مریم نواز نے یوم آزادی کے موقع پر قوم کو مبارکباد دیتے ہوئے کہا ہے کہ پاکستان آج اقوامِ عالم میں سر بلند ہے اور معاشی بلندیوں کی جانب گامزن ہے۔ ان کا کہنا تھا کہ ہمیں یہ عظیم سرزمین عطا کرنے اور باوقار، آزاد زندگی گزارنے کا موقع دینے پر اللہ تعالیٰ کا شکر ادا کرنا چاہیے۔ انہوں نے 78ویں یوم آزادی پر پوری قوم کو مبارکباد دی۔
اپنے پیغام میں مریم نواز نے کہا کہ پاکستان کو دنیائے اسلام کی پہلی ایٹمی طاقت بننے پر بے حد فخر ہے، اور حالیہ "معرکۂ حق” میں کامیابی پر ہم اللہ کے شکر گزار ہیں۔ ان کا کہنا تھا کہ پاکستان ایک روشن چراغ ہے، جس کی لو سے دنیا چمک رہی ہے۔ یہ ملک ہماری آن، بان اور شان ہے، اور پاکستان کے بغیر ہماری کوئی شناخت نہیں۔
وزیراعلیٰ پنجاب نے قائداعظم محمد علی جناح، علامہ اقبال اور تحریکِ آزادی کے تمام رہنماؤں و کارکنوں کو زبردست خراجِ تحسین پیش کیا۔ انہوں نے کہا کہ یومِ آزادی مناتے ہوئے ہم ان لاکھوں شہداء کو کبھی نہیں بھول سکتے جنہوں نے یہ ملک بنانے اور اس کی حفاظت کے لیے اپنی جانیں قربان کیں۔
مریم نواز نے اپنے بیان میں کہا کہ یوم آزادی خود احتسابی کا دن بھی ہے۔ ہمیں سوچنا ہوگا کہ پاکستان نے ہمیں سب کچھ دیا، لیکن ہم نے بدلے میں ملک کو کیا دیا؟ خوشی کی بات یہ ہے کہ آج قوم جاگ چکی ہے اور ملک کی سرحدوں پر ہمارے بہادر جوان پوری مستعدی سے جاگ رہے ہیں۔
