وزیر اعلیٰ پنجاب مریم نواز نے صوبے بھر میں غیر قانونی طور پر مقیم افغان باشندوں کو پراپرٹی یا کرایہ پر جگہ دینے والوں کے خلاف ایف آئی آر درج کرنے کا حکم دے دیا۔
وزیر اعلیٰ کی زیر صدارت امن و امان سے متعلق اجلاس میں فیصلہ کیا گیا کہ گھر، دکان، فیکٹری، ہوٹل، پیٹرول پمپ یا دیگر عمارتیں کرائے پر دینے کی تفصیلات کی روزانہ رپورٹ پیش کی جائے گی، جبکہ غیر قانونی طور پر مقیم افغان باشندوں کی نشاندہی کے لیے مساجد میں اعلانات کرانے کی ہدایت بھی جاری کی گئی۔
اجلاس میں پٹواری، نمبردار اور ایس ایچ او کو غیر ملکیوں کو دی گئی پراپرٹی کی رپورٹنگ کا ذمہ دار قرار دیا گیا۔ اس کے ساتھ ساتھ صوبے کے تمام اضلاع میں غیر قانونی غیر ملکیوں سے متعلق فیلڈ سروے کرانے پر بھی اتفاق کیا گیا۔
مریم نواز نے واضح ہدایت دی کہ وزٹ ویزے پر یا غیر قانونی طور پر داخل ہو کر ملازمت کرنے والے غیر ملکیوں کے خلاف قانونی کارروائی کی جائے۔
ہیپی برتھ ڈے: مریم نواز نے زندگی کی 52 بہاریں دیکھ لیں
اجلاس کو بریفنگ میں بتایا گیا کہ خانیوال میں اب تک 5 مقدمات درج کیے جا چکے ہیں جہاں افغان باشندوں کو پراپرٹی کرائے پر دی گئی تھی۔ اس کے علاوہ 45 ہولڈنگ سینٹرز صوبے بھر میں قائم کیے گئے ہیں جہاں غیر قانونی مقیم افغان باشندوں کو قیام، طعام اور طورخم بارڈر تک ٹرانسپورٹ فراہم کی جا رہی ہے۔
حکام نے مزید بتایا کہ افغان باشندوں کی نشاندہی کے لیے چہرے سے شناخت کی جدید ٹیکنالوجی (Face Recognition System) کا استعمال بھی کیا جا رہا ہے تاکہ آپریشن کو مؤثر بنایا جا سکے۔
