مسجد پر تصویر لگانے کا معاملہ: مریم نواز کا سخت نوٹس، ڈی سی منڈی بہاؤالدین سے وضاحت طلب

وزیراعلیٰ پنجاب مریم نواز نے منڈی بہاؤالدین میں مسجد کی دیوار پر اپنی تصویر آویزاں کیے جانے کا سخت نوٹس لیتے ہوئے ڈپٹی کمشنر سے فوری وضاحت طلب کر لی ہے۔

واقعہ فلڈ ریلیف کیمپ کے تحت قائم ایک عارضی مسجد کا ہے، جہاں ایک بینر نصب کیا گیا تھا جس پر مریم نواز کی تصویر موجود تھی۔ سوشل میڈیا پر اس تصویر کے وائرل ہونے کے بعد عوامی حلقوں اور صارفین کی جانب سے شدید ردعمل سامنے آیا، جس میں اسے مذہبی مقامات کے تقدس کے منافی قرار دیا گیا۔

وزیراعلیٰ نے اس اقدام پر ناراضگی کا اظہار کرتے ہوئے ڈپٹی کمشنر منڈی بہاؤالدین کی سرزنش کی اور ضلعی انتظامیہ سمیت تمام سرکاری اداروں کو ہدایت جاری کی کہ ان کی تصاویر کے استعمال سے متعلق وضع کردہ ایس او پیز (SOPs) کی مکمل پابندی کی جائے۔

دوسری جانب، صوبے کے مختلف سیلاب زدہ علاقوں میں اسکول بند رکھنے کا بھی اعلان کیا گیا ہے، تاکہ متاثرہ خاندانوں کو ریلیف سرگرمیوں میں آسانی فراہم کی جا سکے۔