لاہور، وزیراعلیٰ پنجاب مریم نواز شریف نے بے گھر افراد کے لیے "اپنی زمین، اپنا گھر” اسکیم کے ای پورٹل کا افتتاح کر دیا، جس کے تحت شہری 3 مرلے کے مفت پلاٹس کے لیے آن لائن درخواست دے سکیں گے۔
مریم نواز نے لاہور میں تقریب کے دوران پورٹل azag.punjab.gov.pk کا افتتاح کیا، یہ اسکیم "اپنی چھت، اپنا گھر” پروگرام کا تسلسل ہے، جس کے تحت 34 ہزار گھروں کی تعمیر کا عمل جاری ہے جبکہ 2 ہزار مکانات مکمل ہو چکے ہیں۔
اس منصوبے کے پہلے مرحلے میں پنجاب کے 19 اضلاع کی 23 ہاؤسنگ اسکیموں میں 3 مرلے کے 2 ہزار پلاٹس مفت دیے جائیں گے۔
ابتدائی طور پر جہلم، پتوکی، ماموں کانجن، لودھراں اور رینالہ خورد میں پلاٹ دیے جائیں گے، قرعہ اندازی کے ذریعے مستحق افراد کو گھر کی تعمیر کے لیے آسان اقساط پر قرضے بھی فراہم کیے جائیں گے۔
وزیراعلیٰ نے کہا کہ یہ منصوبہ صرف مکانوں کی تعمیر نہیں بلکہ ہزاروں خاندانوں کی امیدوں کا عکاس ہے، قرض کی ادائیگی میں آسان اقساط اور تین ماہ کی مہلت دی گئی ہے جبکہ قرض واپسی کا عمل بھی شروع ہو چکا ہے۔
مریم نواز نے کہا کہ یہ پروگرام اُن کے دل کے بہت قریب ہے اور قائد نواز شریف کا خواب ہے کہ ہر پاکستانی کو اپنی چھت میسر ہو، انہوں نے دعویٰ کیا کہ گزشتہ حکومتیں دہائیوں میں بھی اتنے گھر نہ بنا سکیں جتنے موجودہ حکومت نے چھ ماہ میں شروع کر دیے ہیں۔
اس موقع پر صوبائی وزیر ہاؤسنگ بلال یاسین نے بتایا کہ "اپنی چھت، اپنا گھر” اسکیم کے تحت 33,500 افراد کو گھروں کی تعمیر کے لیے 36 ارب روپے کے قرضے دیے جا چکے ہیں۔
