گلگت بلتستان میں ہونے والی سالانہ ٹرافی ہنٹنگ نیلامی ایک تاریخی موقع بن گئی، جہاں پاکستان کے قومی جانور مارخور کے شکار کا پرمٹ ریکارڈ 10 کروڑ روپے (تقریباً 3 لاکھ 70 ہزار امریکی ڈالر) میں نیلام ہوا۔ یہ پرمٹ نانگا پربت کنزروینسی ایریا کے لیے جاری کیا گیا، جو "شکار سفاریز” نامی ادارے کے مالک نے حاصل کیا۔
نیلامی کی یہ تقریب فاریسٹ، پارکس اینڈ وائلڈ لائف کمپلیکس گلگت میں منعقد ہوئی، جس میں ملکی و غیر ملکی شکاریوں، ماہرینِ جنگلی حیات اور وائلڈ لائف حکام نے بھرپور شرکت کی۔ اس موقع پر نہ صرف مارخور بلکہ دیگر نایاب جانوروں جیسے ہمالیائی آئی بیکس اور بلیو شیپ کے شکار کے پرمٹس بھی نیلام کیے گئے۔
حکام کے مطابق شکار سیزن 2025-26 کے لیے کل 118 جانوروں کے شکار کے پرمٹس پیش کیے گئے، جن میں 4 استور مارخور، 100 ہمالیائی آئی بیکس اور 14 بلیو شیپ شامل تھے۔
ٹرافی ہنٹنگ پروگرام کے تحت حاصل ہونے والی آمدنی کا 80 فیصد حصہ مقامی کمیونٹیز کو دیا جاتا ہے، جسے وہ جنگلی حیات کے تحفظ، سیاحت کے فروغ اور مقامی ترقیاتی منصوبوں پر خرچ کرتے ہیں۔
ہسپانوی شکاری نے سیزن کے دوسرے کشمیری مارخور کا شکار کر لیا
ماہرین کے مطابق اس بار مارخور کا شکار ریکارڈ قیمت پر نیلام ہونا اس بات کا ثبوت ہے کہ دنیا بھر میں گلگت بلتستان کی جنگلی حیات کو نہایت قیمتی اور منفرد سمجھا جاتا ہے۔ اس اقدام سے نہ صرف قدرتی وسائل کے پائیدار استعمال کو فروغ ملتا ہے بلکہ مقامی سطح پر روزگار اور ماحول کے تحفظ میں بھی مدد ملتی ہے۔
