منڈی بہاؤالدین میں ضلعی انتظامیہ نے ذخیرہ اندوزوں کے خلاف بڑی کارروائی کرتے ہوئے دو مقامات پر چھاپے مار کر 400 ٹن سے زائد گندم برآمد کر لی۔ برآمد شدہ گندم کی مالیت تقریباً 3 کروڑ روپے بتائی جا رہی ہے۔
اسسٹنٹ کمشنر غزالہ یاسین چدھڑ کے مطابق کارروائی بکن اور چوٹ دھیراں کے علاقوں میں کی گئی، جہاں مخصوص گوداموں میں بڑی مقدار میں گندم غیرقانونی طور پر ذخیرہ کی گئی تھی۔ چھاپے کے دوران 10 ہزار گندم کے تھیلے قبضے میں لیے گئے۔
اسسٹنٹ کمشنر نے بتایا کہ برآمد کی گئی گندم کو فوری طور پر فلور ملز منتقل کیا گیا ہے تاکہ عوام کو آٹا سرکاری نرخوں پر فراہم کیا جا سکے۔ انہوں نے مزید کہا کہ ذخیرہ اندوزی کے خلاف کریک ڈاؤن جاری رہے گا اور کسی کو بھی مصنوعی بحران پیدا کرنے کی اجازت نہیں دی جائے گی۔
پنجاب میں گندم کی قیمت میں 600 روپے اضافہ، روٹی بھی مہنگی ہونے کا خدشہ
یہ کارروائی ایسے وقت میں عمل میں لائی گئی ہے جب مختلف علاقوں سے گندم کی قلت اور آٹے کی قیمتوں میں اضافے کی شکایات سامنے آ رہی تھیں۔ ضلعی انتظامیہ نے عوام سے اپیل کی ہے کہ وہ ذخیرہ اندوزی یا گراں فروشی کی اطلاع فوری طور پر متعلقہ حکام کو دیں تاکہ بروقت کارروائی کی جا سکے۔
