کراچی کی ملیر جیل سے زلزلے کے دوران فرار ہونے والے قیدیوں میں سے مزید تین کو گرفتار کر لیا گیا، مجموعی گرفتاریاں 90 ہو گئیں، جبکہ 126 قیدی تاحال مفرور ہیں۔
کراچی کے علاقے ملیر میں زلزلے کے دوران جیل سے فرار ہونے والے قیدیوں میں سے مزید تین کو گرفتار کر لیا گیا ہے۔ جیل حکام کے مطابق مجموعی طور پر گرفتار قیدیوں کی تعداد اب 90 ہو چکی ہے جبکہ 126 قیدی اب بھی مفرور ہیں جن کی گرفتاری کے لیے آپریشن بھرپور انداز میں جاری ہے۔
حکام نے بتایا کہ مفرور قیدیوں کی گرفتاری کے لیے مختلف مقامات پر چھاپے مارے جا رہے ہیں اور اُن کے گھروں کی نگرانی کی جا رہی ہے۔ حکام کا مزید کہنا ہے کہ اگر کوئی قیدی رضا کارانہ طور پر واپس آتا ہے تو اُس کے ساتھ قانون کے دائرے میں رہتے ہوئے نرمی برتی جائے گی۔
پولیس حکام کے مطابق فرار کے اس واقعے کا مقدمہ تھانہ شاہ لطیف ٹاؤن میں درج کیا گیا ہے، جس میں پولیس مقابلہ، اقدام قتل، ڈکیتی اور انسدادِ دہشت گردی کی دفعات شامل کی گئی ہیں۔
ذرائع کے مطابق قیدیوں کے فرار کا یہ واقعہ ملیر جیل کی سکیورٹی پر کئی سوالات اٹھا رہا ہے، اور اس معاملے کی مکمل تحقیقات کی جا رہی ہیں تاکہ ذمہ داروں کا تعین کیا جا سکے۔
یاد رہے کہ گزشتہ دنوں کراچی کے علاقے ملیر میں آنے والے زلزلے کے دوران جیل میں ہنگامہ آرائی کے بعد درجنوں قیدی فرار ہو گئے تھے، جس کے بعد شہر بھر میں سکیورٹی ہائی الرٹ کر دی گئی تھی۔ اس واقعے کو ملکی جیلوں کی سکیورٹی کے نظام پر ایک سنجیدہ سوالیہ نشان قرار دیا جا رہا ہے۔
