11
لاہور کے مختلف علاقوں میں کرائم کنٹرول ڈپارٹمنٹ (سی سی ڈی) کے مبینہ پولیس مقابلوں میں 6 ملزمان ہلاک ہوگئے۔
جیو نیوز کے مطابق یہ مبینہ مقابلے نشتر ٹاؤن، گرین ٹاؤن، رنگ روڈ اور ہربنس پورہ میں پیش آئے، جس دوران سیکیورٹی اہلکاروں کی فائرنگ میں ملزمان ہلاک ہوئے۔
پولیس کے مطابق نشتر ٹاؤن میں ناکے پر ملزمان کی فائرنگ کے جواب میں پولیس نے جوابی فائرنگ کی، جس میں 2 ملزمان ہلاک ہوئے۔ گرین ٹاؤن میں زیر حراست ایک ملزم ساتھیوں کی فائرنگ سے ہلاک ہوا۔
رنگ روڈ پر مقابلے میں 2 ملزمان ہلاک ہوئے اور 2 فرار ہونے میں کامیاب رہے، جبکہ ریلوے پھاٹک ہربنس پورہ کے قریب ایک اور ملزم مقابلے میں ہلاک ہوا۔
پولیس حکام کا کہنا ہے کہ یہ کارروائیاں قانون نافذ کرنے والے اداروں کی جرائم کے خلاف جاری کارروائیوں کا حصہ ہیں۔
