پشاور سمیت خیبرپختونخوا کے 13 اضلاع میں چہلم امام حسینؓ کے موقع پر دفعہ 144 نافذ، ڈبل سواری، اشتعال انگیز تقریر، اسلحہ نمائش اور افغان باشندوں کی عوامی نقل و حرکت پر پابندی عائد۔
پشاور، خیبرپختونخوا حکومت نے چہلم امام حسینؓ کے موقع پر امن و امان کی صورتحال یقینی بنانے کیلئے صوبے کے 13 اضلاع میں 7 روز کیلئے دفعہ 144 نافذ کر دی ہے۔
جاری اعلامیے کے مطابق پشاور، کوہاٹ، ہنگو، بنوں، ٹانک، ڈیرہ اسماعیل خان، ایبٹ آباد، مانسہرہ، ہری پور، نوشہرہ، کرم، مردان اور لکی مروت میں یہ پابندیاں نافذ ہوں گی۔ اس دوران موٹرسائیکل کی ڈبل سواری، وال چاکنگ، اشتعال انگیز تقریروں، اسلحہ کی نمائش، ہوائی فائرنگ، لاؤڈ اسپیکر کے استعمال اور آتشبازی پر مکمل پابندی ہوگی۔
نوٹیفکیشن میں کہا گیا ہے کہ چہلم کے جلوسوں کی گزرگاہوں پر چھتوں پر موجودگی ممنوع ہوگی جبکہ افغان باشندوں کی عوامی مقامات پر نقل و حرکت پر بھی پابندی عائد کر دی گئی ہے۔
دفعہ 144 کے تحت غیر متعلقہ افراد کا جلوسوں کے راستوں اور حساس مقامات میں داخلہ محدود کر دیا گیا ہے۔ حکومتی اعلامیے میں شہریوں سے اپیل کی گئی ہے کہ وہ امن و امان قائم رکھنے کیلئے احکامات پر سختی سے عمل کریں۔
