خیبر پختونخوا میں سکیورٹی فورسز نے دو الگ کارروائیوں میں بھارتی حمایت یافتہ فتنۂ الخوارج کے 15 دہشتگردوں کو ہلاک کر دیا ہے۔ آئی ایس پی آر کے مطابق یہ آپریشنز 15 اور 16 نومبر کو مصدقہ انٹیلیجنس رپورٹس کی بنیاد پر کیے گئے۔
ترجمان کے مطابق ڈی آئی خان کے کلاچی اور شمالی وزیرستان کے دتہ خیل میں ہونے والے انٹیلیجنس بیسڈ آپریشنز (IBOs) کے دوران دہشتگردوں کے ٹھکانوں کو کامیابی سے نشانہ بنایا گیا۔ ایک کارروائی میں 10 جبکہ دوسری میں 5 دہشتگرد مارے گئے۔
آئی ایس پی آر نے تصدیق کی کہ کلاچی میں کی گئی کارروائی کے دوران ہلاک افراد میں گروپ کا اہم سرغنہ عالم محسود بھی شامل تھا۔
فوج کے ترجمان کے مطابق علاقے میں بھارتی سرپرستی یافتہ دہشتگردوں کے نیٹ ورک کے خاتمے کے لیے کلیئرنس آپریشن جاری ہے، اور غیر ملکی حمایت یافتہ دہشتگردی کے مکمل خاتمے تک انسدادِ دہشتگردی کی مہم جاری رکھی جائے گی۔
