پشاور: خیبرپختونخوا میں گورنر راج نافذ کرنے کے امکان پر غور شروع کیا گیا ہے، جس کے لیے موجودہ گورنر فیصل کریم کنڈی کو برقرار رکھنے یا ان کی جگہ نیا گورنر تعینات کرنے کی تجاویز زیر غور ہیں۔
ذرائع کے مطابق، نئے گورنر کے لیے تین سابق فوجی افسران اور تین سیاسی شخصیات کے نام سامنے آئے ہیں۔ سیاسی شخصیات میں امیر حیدر ہوتی، پرویز خٹک اور آفتاب شیر پاؤ شامل ہیں، جبکہ سابق فوجی افسران میں سابق کور کمانڈر پشاور لیفٹیننٹ جنرل (ر) خالد ربانی، لیفٹیننٹ جنرل (ر) غیور محمود اور لیفٹیننٹ جنرل (ر) طارق خان کے نام زیر غور ہیں۔
دوسری جانب، وزیراعظم آفس نے تصدیق کی ہے کہ خیبرپختونخوا میں گورنر راج کے حوالے سے تاحال کوئی فیصلہ نہیں ہوا۔
گورنر فیصل کریم کنڈی نے پشاور میں صحافیوں سے گفتگو کرتے ہوئے کہا کہ انہیں اپنی تبدیلی کے حوالے سے کوئی اطلاع نہیں دی گئی اور وہ میڈیا کے ذریعے ہی اس کے بارے میں سن رہے ہیں۔ انہوں نے کہا کہ صوبے کی ذمہ داری صوبائی حکومت کے پاس ہے اور حالات احتجاج کی اجازت نہیں دیتے۔ گورنر راج کے نفاذ کے حوالے سے ابھی کوئی عملی بات نہیں ہوئی ہے، تاہم پارٹی کے فیصلے کو قبول کیا جائے گا۔
