خیبر پختونخوا میں وزیراعلیٰ کے انتخاب کا مرحلہ تیزی سے قریب آ رہا ہے، جہاں ووٹنگ کل ہوگی، جبکہ آج دوپہر 3 بجے تک کاغذاتِ نامزدگی جمع کرائے جا سکیں گے۔ اسپیکر صوبائی اسمبلی کی زیرِ نگرانی نامزدگیوں کی جانچ پڑتال شام 4 بجے تک مکمل کی جائے گی، اور امیدواروں کی حتمی فہرست شام 5 بجے جاری کی جائے گی۔
دوسری جانب سیاسی میدان میں اپوزیشن جماعتوں نے وزارتِ اعلیٰ کے لیے مشترکہ امیدوار لانے کا فیصلہ کیا ہے۔ ذرائع کے مطابق اپوزیشن کے درمیان مشاورت جاری ہے، مگر تاحال کسی ایک نام پر حتمی اتفاق نہیں ہو سکا۔
ادھر چند روز قبل پی ٹی آئی کے بانی عمران خان نے سابق وزیراعلیٰ علی امین گنڈاپور کو عہدے سے ہٹاتے ہوئے سہیل آفریدی کو نیا وزیر اعلیٰ نامزد کیا تھا، جس کے بعد علی امین نے استعفیٰ دے کر وزیراعلیٰ ہاؤس چھوڑ دیا اور ڈیرہ اسماعیل خان روانہ ہو گئے۔
سہیل آفریدی کا ردعمل: وزیراعلیٰ خیبرپختونخوا کی نامزدگی کی خبر مجھے بھی میڈیا سے ملی
سیاسی تجزیہ کاروں کے مطابق وزیراعلیٰ کا انتخاب سیاسی اتحادوں، جوڑ توڑ اور آخری لمحات کے فیصلوں پر منحصر ہوگا۔ کل کی ووٹنگ میں نتیجہ واضح ہو جائے گا کہ آیا حکومت اپنا نامزد کردہ امیدوار منتخب کروا پاتی ہے یا اپوزیشن اتحاد کوئی سرپرائز دیتا ہے۔
