وزیراعلیٰ خیبر پختونخوا علی امین گنڈاپور نے پولیس شہداء کی قربانیوں کو خراجِ عقیدت پیش کرتے ہوئے ان کے لواحقین کے لیے پلاٹ دینے کا اعلان کیا ہے۔
یومِ شہداء پولیس کی تقریب سے خطاب کرتے ہوئے وزیراعلیٰ نے کہا کہ خیبر پختونخوا پولیس نے دہشتگردی کے خلاف جنگ میں جو قربانیاں دیں، وہ ناقابلِ فراموش ہیں۔ “پولیس کے شہداء کی ایک طویل اور سنہری تاریخ ہے، ہم ان کے مقروض ہیں،” انہوں نے کہا۔
علی امین گنڈاپور نے اعلان کیا کہ شہداء کے مالی پیکج میں اضافہ کیا گیا ہے اور ان کے اہلِ خانہ کو ہر ممکن تعاون فراہم کیا جائے گا۔ “ہم نے پولیس کو جدید ٹیکنالوجی سے لیس کرنے کا عمل تیز کیا ہے تاکہ وہ دہشتگردی جیسے بڑے چیلنجز کا بھرپور مقابلہ کر سکیں،” انہوں نے کہا۔
وزیراعلیٰ کا کہنا تھا کہ صوبائی حکومت نے پولیس کے بجٹ میں خاطر خواہ اضافہ کیا ہے۔ “گزشتہ سال پولیس کا بجٹ 124 ارب روپے تھا، رواں سال اسے بڑھا کر 158 ارب روپے کر دیا گیا ہے، تاکہ اہلکاروں کو درپیش سہولیات کی کمی کا ازالہ کیا جا سکے۔”
انہوں نے مزید کہا، “ہمیں شہداء کے خاندانوں کا بھرپور خیال رکھنا ہے، کیونکہ ان کی قربانیاں اس ملک کے امن کی بنیاد ہیں۔ شہادت کا رتبہ بہت بلند ہے، اور ہمیں اپنی پولیس فورس پر فخر ہے۔”
آخر میں وزیراعلیٰ نے اس عزم کا اظہار کیا کہ پولیس فورس کو مضبوط اور شہداء کے لواحقین کو باعزت زندگی دینے کے لیے ہر ممکن اقدام کیا جائے گا۔
