وزیر دفاع خواجہ محمد آصف نے کہا ہے کہ انہیں محمود خان اچکزئی یا کسی بھی فرد کے انتخاب پر کوئی اعتراض نہیں۔ انہوں نے یہ بات پارلیمنٹ کے باہر میڈیا سے گفتگو کے دوران کہی اور واضح کیا کہ موجودہ مذاکرات زیادہ تر اخباری بیانات تک محدود ہیں اور سنجیدہ مذاکرات میں فی الحال کوئی خاص پیشرفت نہیں ہوئی۔
خواجہ آصف نے کہا کہ اپوزیشن جس فرد کو بھی نامزد کرے، حکومت اسے تسلیم کرے گی۔ اگر اپوزیشن محمود خان اچکزئی کو منتخب کرتی ہے تو انہیں نام دے دینا چاہیے، اور اس کے بعد اسپیکر کی صوابدید ہوگی کہ وہ اپوزیشن لیڈر کے لیے نام کو منظور کریں۔ وزیر دفاع نے زور دیا کہ اس معاملے میں حکومت کو زیادہ مداخلت نہیں کرنی چاہیے۔
انہوں نے یہ بھی کہا کہ قومی اسمبلی کے فلور پر جو کشیدگی دیکھی جاتی ہے، وہ میٹنگز میں موجود نہیں ہوتی، اور ملاقاتوں کے دوران اپوزیشن اور حکومت کے درمیان تعلقات زیادہ ہموار اور تعمیری رہتے ہیں۔
