شہر قائد کے علاقے نارتھ ناظم آباد میں معمولی جھگڑے نے افسوسناک رخ اختیار کر لیا جہاں سکیورٹی گارڈ کی فائرنگ سے ایک شہری جان کی بازی ہار گیا۔ واقعہ نارتھ ناظم آباد بلاک سی میں پیش آیا جس کے بعد علاقے میں خوف و ہراس پھیل گیا۔
پولیس حکام کے مطابق سکیورٹی گارڈ وکیل احمد اور مقتول کے درمیان کسی بات پر تلخ کلامی ہوئی جو شدت اختیار کر گئی۔ بحث کے دوران گارڈ نے مبینہ طور پر فائرنگ کر دی جس کے نتیجے میں ولید نامی شخص موقع پر ہی شدید زخمی ہو گیا۔ اسے فوری طور پر طبی امداد کے لیے اسپتال منتقل کیا گیا تاہم وہ جانبر نہ ہو سکا۔
ابتدائی تحقیقات کے مطابق مقتول قریبی گھر میں بطور مہمان آیا ہوا تھا۔ فائرنگ کرنے والا سکیورٹی گارڈ نزدیکی بنگلے پر تعینات تھا۔ پولیس کا کہنا ہے کہ واقعے کی وجوہات جاننے کے لیے مختلف پہلوؤں سے تفتیش جاری ہے تاکہ اصل حقائق سامنے لائے جا سکیں۔
کراچی فوڈ ڈیلیوری رائیڈر کی ہلاکت، ملزم اسسٹنٹ کمشنر کا بھتیجا نکلا
قانون نافذ کرنے والے اداروں نے فوری کارروائی کرتے ہوئے ملزم سکیورٹی گارڈ کو گرفتار کر لیا ہے اور اس کے قبضے سے اسلحہ بھی تحویل میں لے لیا گیا ہے۔ مقتول کی لاش کو قانونی کارروائی کے لیے اسپتال منتقل کر دیا گیا ہے جبکہ اہل خانہ کو اطلاع دے دی گئی ہے۔
پولیس حکام کا کہنا ہے کہ واقعے کا مقدمہ درج کر کے مزید شواہد اکٹھے کیے جا رہے ہیں اور معاملے کی مکمل چھان بین کے بعد چالان عدالت میں پیش کیا جائے گا۔ شہری حلقوں نے مطالبہ کیا ہے کہ نجی سکیورٹی گارڈز کی تربیت اور اسلحہ رکھنے کے ضوابط کو مزید سخت کیا جائے تاکہ ایسے افسوسناک واقعات کی روک تھام ممکن بنائی جا سکے۔
