کراچی: شہر قائد میں صبح سویرے ہونے والی بارش نے معمولاتِ زندگی کو ایک بار پھر متاثر کر دیا۔ کہیں ہلکی پھوار تو کہیں تیز بارش نے سڑکوں پر پانی جمع کر دیا، جس کے باعث شہریوں کو آمد و رفت میں شدید مشکلات کا سامنا ہے۔
بارش کے باعث کورنگی ندی اور کازوے روڈ پر پانی کی سطح خطرناک حد تک بلند ہو گئی ہے، جس کے پیشِ نظر ان راستوں کو ٹریفک کے لیے بند کر دیا گیا ہے۔ انتظامیہ کے مطابق کازوے روڈ کے متعدد مقامات سے زمین دھنس چکی ہے، جبکہ کچھ حصے بارش کے پانی کے بہاؤ میں بہہ بھی گئے ہیں۔
شہریوں کو ممکنہ خطرات سے بچانے کے لیے پولیس اہلکاروں کو کازوے اور کورنگی ندی کے داخلی راستوں پر تعینات کر دیا گیا ہے۔ ان اہلکاروں کو ہدایت دی گئی ہے کہ کسی بھی شہری کو متاثرہ علاقوں میں داخل نہ ہونے دیا جائے۔
متبادل راستوں کی طرف ٹریفک کا رخ موڑ دیا گیا ہے تاکہ ٹریفک کی روانی برقرار رہے اور حادثات سے بچا جا سکے۔
شہر کے علاقوں گارڈن، تین ہٹی، نشتر روڈ اور لسبیلہ میں ہلکی بارش کا سلسلہ جاری ہے جبکہ نشیبی علاقوں میں پانی جمع ہونے کے باعث مقامی افراد کو آمد و رفت میں پریشانی کا سامنا ہے۔
انتظامیہ کی جانب سے شہریوں سے اپیل کی گئی ہے کہ غیر ضروری سفر سے گریز کریں اور متاثرہ علاقوں کی طرف جانے سے پرہیز کریں۔ بارش کا سلسلہ مزید جاری رہنے کی توقع ہے جس کے باعث صورتحال مزید سنگین ہو سکتی ہے۔
