کراچی میں مسلم لیگ (ن) سندھ کے ترجمان اسد عثمانی نے میئر کراچی مرتضیٰ وہاب پر شدید تنقید کرتے ہوئے کہا ہے کہ ان کی جانب سے گرین لائن منصوبے کا کام رکوانا کراچی دشمنی کا کھلا ثبوت ہے۔ ان کا کہنا تھا کہ میئر نہ خود کچھ کرتے ہیں اور نہ دوسروں کو کام کرنے دیتے ہیں، جس کے باعث شہر کی عوام شدید مشکلات کا شکار ہے۔
اسد عثمانی نے کہا کہ مرتضیٰ وہاب کے متکبرانہ رویے سے شہری عاجز آچکے ہیں اور ان کا طرز عمل عوامی خدمت کی راہ میں رکاوٹ بن چکا ہے۔ انہوں نے دعویٰ کیا کہ موجودہ بلدیاتی نظام نے کراچی کو تباہی کے دہانے پر پہنچا دیا ہے۔
مزید برآں، مسلم لیگ ن کے ترجمان نے الزام لگایا کہ میئر کراچی شہر کو موہن جو دڑو میں تبدیل کرنا چاہتے ہیں۔ انہوں نے جماعت اسلامی اور تحریک انصاف کے ٹاؤن چیئرمینوں کو بھی تنقید کا نشانہ بنایا اور کہا کہ وہ عوامی خدمت کے بجائے صرف پیسے کمانے میں مصروف ہیں۔
اسد عثمانی کے مطابق پورا کراچی اس وقت آفت زدہ شہر کا منظر پیش کر رہا ہے، اور موجودہ بلدیاتی قیادت عوام کی امیدوں پر پورا اترنے میں مکمل طور پر ناکام ہو چکی ہے۔
