کراچی،امیر جماعت اسلامی کراچی منعم ظفر خان نے ایم کیو ایم پر شدید تنقید کرتے ہوئے کہا ہے کہ ان کے وزراء مزے لے رہے ہیں جبکہ کراچی تباہ ہو چکا ہے۔
شہر میں بارشوں کے بعد کی صورتحال پر گفتگو کرتے ہوئے انہوں نے کہا کہ کراچی کی مجموعی صورتحال پر اطمینان کا اظہار نہیں کیا جا سکتا۔ حکومت نے نالوں کی صفائی کے لئے **7 کروڑ روپے مختص کیے تھے لیکن کوئی کام نہیں ہوا۔
ان کا کہنا تھا کہ **لیاری ندی اور گجر نالے کا پانی سمندر جانے کے بجائے الٹا باہر آرہا تھا، گجر اور اورنگی نالے اوور فلو کر رہے تھے**۔ ہم نے اپنے ٹاؤنز کے اندر انٹر نالوں کی صفائی کی اور پمپس سے پانی نکالا، لیکن نکلا ہوا پانی ڈالیں کہاں؟
منعم ظفر کا کہنا تھا کہ لنڈی کوتل سڑک ایک سال سے کھدی ہوئی ہے، سعید غنی سے مسلسل رابطے میں رہتے ہیں لیکن ڈیولپمنٹ کے نام پر ٹاؤنز کو ایک پیسہ نہیں دیا گیا۔ جماعت اسلامی اپنے وسائل کے ذریعے کام کر رہی ہے۔
انہوں نے مزید کہا کہ گورنر سندھ ایم کیو ایم کا حصہ ہیں، انہیں وفاق سے بات کرنی چاہیے۔ کے-4 منصوبہ ایم کیو ایم اور پیپلز پارٹی مکمل نہیں کر سکیں، یہ دونوں جماعتوں کی نااہلی ہے۔
امیر جماعت اسلامی کراچی نے کہا کہ گلشن ٹاؤن میں ریڈ لائن منصوبے کے لیے تمام نالے توڑ دیے گئے، جس سے سیوریج کا نظام تباہ ہو گیا ہے۔ ان کا مطالبہ تھا کہ کراچی کے لیے بااختیار بلدیاتی نظام ہونا ضروری ہے۔
