راولپنڈی کے علاقے چوآ خالصہ میں نالے میں نہاتے ہوئے تین بچے ڈوب گئے، ریسکیو ٹیموں نے لاشیں نکال کر لواحقین کے سپرد کر دیں
راولپنڈی کے نواحی علاقے کلر سیداں میں ایک دلخراش واقعہ پیش آیا، جہاں تین معصوم بچے برساتی نالے میں نہاتے ہوئے جان کی بازی ہار گئے۔ افسوسناک واقعہ چوآ خالصہ کے قریب پیش آیا، جہاں مقامی طور پر بہنے والے نالے میں نہانے کے دوران بچے گہرے پانی میں پھنس کر ڈوب گئے۔ اطلاع ملنے پر ریسکیو ٹیمیں فوری طور پر موقع پر پہنچ گئیں اور بھرپور تلاش کے بعد بچوں کی لاشیں نکال کر لواحقین کے سپرد کر دیں۔
جاں بحق بچوں کی شناخت دس سالہ عثمان ندیم، نو سالہ طیبہ ندیم اور چھ سالہ حمزہ آفتاب کے طور پر ہوئی ہے۔ واقعے کے بعد علاقے کی فضا سوگوار ہو گئی اور ہر آنکھ اشکبار نظر آئی۔ اہل علاقہ نے اس اندوہناک سانحے پر شدید رنج و غم کا اظہار کرتے ہوئے انتظامیہ سے مطالبہ کیا کہ ایسے خطرناک مقامات پر وارننگ سائنز اور حفاظتی اقدامات کیے جائیں تاکہ آئندہ کوئی ایسا واقعہ رونما نہ ہو۔
عینی شاہدین کے مطابق بچے گرمی کے باعث نالے میں نہا رہے تھے، تاہم پانی کی گہرائی اور تیز بہاؤ ان کے لیے جان لیوا ثابت ہوا۔ والدین اور عزیز و اقارب پر غم کے پہاڑ ٹوٹ پڑے اور علاقے میں کہرام مچ گیا۔
یاد رہے کہ بارشوں کے موسم میں برساتی نالے جان لیوا ثابت ہو سکتے ہیں، اس لیے والدین اور سرپرستوں کو چاہیے کہ بچوں کو ایسی جگہوں سے دور رکھیں، اور ضلعی انتظامیہ کو بھی فوری حفاظتی تدابیر اختیار کرنی چاہئیں تاکہ قیمتی جانوں کا ضیاع روکا جا سکے۔
