ایوانِ صدر میں حلف برداری: صدر آصف زرداری نے جسٹس سرفراز ڈوگر سے چیف جسٹس اسلام آباد ہائی کورٹ کے عہدے کا حلف لیا۔
اسلام آباد: چیف جسٹس اسلام آباد ہائی کورٹ جسٹس سردار سرفراز ڈوگر نے اپنے عہدے کا حلف اٹھا لیا۔ حلف برداری کی تقریب ایوانِ صدر اسلام آباد میں منعقد ہوئی، جہاں صدرِ مملکت آصف علی زرداری نے ان سے عہدے کا حلف لیا۔ تقریب میں اعلیٰ عدلیہ کے ججز، سینئر وکلا اور حکومتی شخصیات نے شرکت کی۔
حلف برداری کی تقریب میں وفاقی وزیرِ قانون اعظم نذیر تارڑ، وزیر داخلہ محسن نقوی، چیئرمین سینیٹ یوسف رضا گیلانی اور وزیر اعلیٰ پنجاب مریم نواز بھی موجود تھیں۔
اس موقع پر ملک کی دیگر اعلیٰ عدالتوں میں بھی نئے چیف جسٹس صاحبان نے اپنے عہدوں کا حلف اٹھایا۔ گورنر سندھ کامران ٹیسوری نے چیف جسٹس سندھ ہائی کورٹ جسٹس محمد جنید غفار سے جبکہ گورنر خیبر پختونخوا فیصل کریم کنڈی نے چیف جسٹس پشاور ہائی کورٹ جسٹس ایس ایم عتیق شاہ سے حلف لیا۔
یہ بھی پڑھیں: سندھ، پشاور اور اسلام آباد ہائیکورٹس کے نئے چیف جسٹس صاحبان نے حلف اٹھا لیا
یاد رہے کہ یکم جولائی کو چیف جسٹس آف پاکستان جسٹس یحییٰ آفریدی کی زیرِ صدارت جوڈیشل کمیشن کے اجلاس میں چاروں اعلیٰ عدالتوں کے چیف جسٹسز کی تعیناتی کی منظوری دی گئی تھی۔ اس میں جسٹس سرفراز ڈوگر کو اسلام آباد ہائی کورٹ، جسٹس جنید غفار کو سندھ ہائی کورٹ، جسٹس عتیق شاہ کو پشاور ہائی کورٹ اور جسٹس روزی خان کو بلوچستان ہائی کورٹ کا چیف جسٹس مقرر کیا گیا تھا۔
یاد رہے کہ نئی تقرریوں کے بعد اعلیٰ عدلیہ میں قیادت کی تبدیلی کے ساتھ ساتھ انصاف کی فراہمی کے عمل میں بھی بہتری کی توقع کی جا رہی ہے۔
