اسلام آباد ہائی کورٹ میں جامعات میں بی پی ایس اساتذہ کی پرموشن سے متعلق کیس کی سماعت ہوئی۔ عدالت نے سیکرٹری خزانہ اور ایچ ای سی کو آئندہ سماعت پر اساتذہ کی ترقیوں سے متعلق رپورٹ پیش کرنے کی ہدایت کی۔
نجی ٹی وی چینل ایکسپریس نیوز کے مطابق عدالت نے حکم دیا کہ چیئرمین ایچ ای سی کی تعیناتی کے 15 روز کے اندر پروموشن پالیسی کا اجلاس بلا کر رپورٹ عدالت میں پیش کی جائے۔
دوران سماعت جسٹس محسن اختر کیانی نے کہا کہ ہم 80 کی دہائی کی نسل سے ہیں جنہوں نے ڈکٹیٹر شپ کے دوران آنکھ کھولی۔ یہاں ایسے اساتذہ بھی ہیں جنہیں 17، 18 سال تک مستقل نہیں کیا گیا۔ انہوں نے مزید کہا کہ جب اساتذہ خود مایوس ہوں گے تو طلباء پر بھی اس کا اثر پڑے گا، اور طلباء کو بھی ملک کا دفاع کرنا ہے۔
جسٹس محسن اختر کیانی نے یہ بھی کہا کہ یونیورسٹی کے طلبا ہی آگے جا کر کمانڈ کریں گے اور ملک کے دفاع کا بہترین نمونہ حال ہی میں دیکھا گیا ہے۔ ان کے مطابق اساتذہ کو اچھی جگہ پر ہونا چاہیے کیونکہ "ابھی تو ججز بھی نہیں رہے، صرف اساتذہ ہی ہیں۔”
عدالت نے سیکرٹری خزانہ اور ایچ ای سی کو ہدایات کے ساتھ سماعت جنوری تک ملتوی کر دی۔
