جے یو آئی نے پنجاب میں نئے ٹریفک قوانین کو ظالمانہ قرار دے دیا

لاہور: جمعیت علمائے اسلام (جے یو آئی) نے پنجاب میں نئے ٹریفک قوانین کے نفاذ کو بغیر عوامی آگاہی کے ظالمانہ قرار دیا ہے۔

جے یو آئی پنجاب کے ترجمان حافظ غضنفر عزیز نے کہا کہ حکمران عوام اور مختلف سماجی طبقات کو اعتماد میں لیے بغیر قانون سازی کر کے معاشرے میں انتشار اور ہیجان پیدا کر رہے ہیں۔ ان کا کہنا تھا کہ ترقی یافتہ ممالک کے قوانین کو ترقی پذیر ممالک میں نافذ کرنے سے معاشرتی توازن متاثر ہوتا ہے۔

حافظ غضنفر عزیز نے مزید کہا کہ پنجاب کے حکمران ہوش کے ناخن لیں اور معاشرتی یکجہتی کو نقصان پہنچانے سے گریز کریں، کیونکہ نئے قوانین بیوروکریسی کے ظلم و جبر اور رشوت ستانی میں اضافے کا سبب بن رہے ہیں۔

انہوں نے حکمرانوں پر زور دیا کہ اقتدار کے نشے میں آ کر عوام کی مشکلات میں اضافہ نہ کریں اور قانون سازی میں شفافیت اور عوامی شرکت کو یقینی بنائیں۔