جہلم میں "ستھرا پنجاب مہم” پر موثر عملدرآمد یقینی بنانے کے لیے ڈپٹی کمشنر میثم عباس خود میدان میں آ گئے۔ شدید گرمی کے باوجود انہوں نے مختلف یونین کونسلز کا دورہ کیا اور وہاں صفائی کی مجموعی صورتحال کا خود جائزہ لیا۔
صفائی عملے سے ملاقات، کارکردگی کا معائنہ
ڈپٹی کمشنر نے صفائی مہم کے تحت متحرک سینٹری اسٹاف سے ملاقات کی اور ان کے کام کا قریب سے معائنہ کیا۔ انہوں نے کارکنان کی حوصلہ افزائی کرتے ہوئے ان کے جذبے کو سراہا۔
سپروائزرز سے تفصیلات طلب
اس موقع پر میثم عباس نے صفائی کے ذمہ دار سپروائزرز سے مہم کا شیڈیول، روزانہ کی کارکردگی اور شہری علاقوں میں صفائی کے نظام کے حوالے سے تفصیلی معلومات حاصل کیں۔ انہوں نے واضح کیا کہ صفائی کے نظام میں کسی قسم کی کوتاہی برداشت نہیں کی جائے گی۔
ستھرا پنجاب مہم کو کامیاب بنانے کا عزم
ڈپٹی کمشنر کا کہنا تھا کہ "ستھرا پنجاب” صرف ایک مہم نہیں بلکہ ایک مستقل مزاجی کا تقاضا کرتی ہے، جس کے لیے انتظامیہ، عملہ اور عوام کو ایک ساتھ چلنا ہو گا۔ انہوں نے شہریوں سے بھی اپیل کی کہ صفائی کی اہمیت کو سمجھتے ہوئے انتظامیہ کا ساتھ دیں۔
