ملتان: جلالپور پیر والا میں بند ٹوٹنے کے خدشے کے باعث شہریوں کو فوری طور پر اپنے مکانات خالی کرنے اور محفوظ مقامات پر منتقل ہونے کا حکم دے دیا گیا ہے۔
سی پی او صادق علی ڈوگر نے بتایا کہ پانی کا دباؤ بہت زیادہ بڑھ چکا ہے اور دریائے چناب کا پانی شہر کے قریب بنائے گئے بند کو کسی بھی وقت توڑ سکتا ہے۔ شہریوں کو فوری طور پر حفاظتی اقدامات اختیار کرنے کی ہدایت کی گئی ہے اور پولیس شہر کی مساجد میں اعلانات کر کے لوگوں کو محفوظ مقامات پر منتقل کرنے کی کوششیں کر رہی ہے۔
ریسکیو کے لیے 5 تھرمل ٹیکنالوجی ڈرون منگوائے گئے ہیں جبکہ تحصیل جلالپور کے لیے مزید 50 کشتیاں بھی دستیاب کرائی گئی ہیں۔ سی پی او کا کہنا ہے کہ توقع ہے کہ آج رات تک تمام پھنسے ہوئے افراد کو محفوظ مقامات پر منتقل کر دیا جائے گا۔
بھارت کی جانب سے فراہم کردہ سیلابی معلومات کے بعد پنجاب میں اونچے درجے کے سیلاب کا الرٹ جاری کیا گیا ہے، اور جلالپور پیر والا میں صورتحال خراب ہونے پر پاک فوج کو مدد کے لیے طلب کیا گیا ہے۔ پی ڈی ایم اے پنجاب کے مطابق دریائے ستلج کے ہریکے زیریں اور فیروزپور زیریں اسٹریم میں پانی کا بہاؤ بڑھنے کے باعث اونچے درجے کے سیلاب کا خدشہ ہے۔
ملتان جلال پور میں سیلاب متاثرین کی کشتی الٹنے کی وجہ سامنے آگئی
دوسری جانب ملتان کے شیر شاہ فلڈ بند کے اندر موجود درجنوں بستیوں میں کھڑے پانی کے باعث مکانات گرنے لگے ہیں اور بارش کے باعث سیلاب متاثرین کی مشکلات میں مزید اضافہ ہو گیا ہے۔
