خیبر پختونخوا کے معاون خصوصی برائے اطلاعات شفیع جان نے دعویٰ کیا ہے کہ جیل سپرنٹنڈنٹ اس قدر بااختیار ہو چکے ہیں کہ وہ صوبے کے وزیر اعلیٰ کو بھی بانیٔ پاکستان تحریکِ انصاف عمران خان سے ملاقات کی اجازت نہیں دے رہے۔ ان کا کہنا تھا کہ یہ صورتحال آئین اور عدالتی احکامات کی کھلی خلاف ورزی ہے۔
جیو نیوز کے پروگرام آج شاہزیب خانزادہ کے ساتھ میں گفتگو کرتے ہوئے شفیع جان نے کہا کہ وزیر اعلیٰ خیبر پختونخوا سہیل آفریدی اس بات کا واضح عندیہ دے چکے ہیں کہ اگر وفاق صوبے میں گورنر راج نافذ کرنا چاہتا ہے تو وہ اپنا شوق پورا کر لے۔ انہوں نے سوال اٹھایا کہ آخر خیبر پختونخوا میں ایسے کون سے غیر معمولی حالات ہیں جن کی بنیاد پر گورنر راج لگانے کی بات کی جا رہی ہے۔
شفیع جان کا کہنا تھا کہ صوبائی حکومت اور وفاق کے درمیان جتنا ورکنگ ریلیشن شپ ہونا چاہیے، وہ موجود ہے، اس کے باوجود وزیر اعلیٰ کو عمران خان سے ملاقات کی اجازت نہیں دی جا رہی۔ انہوں نے بتایا کہ وزیر اعلیٰ ہر جمعرات کو ملاقات کے لیے جاتے ہیں، تاہم اس بار بھی انہیں روک دیا گیا، جس پر شدید تحفظات ہیں۔
معاون خصوصی نے کہا کہ صوبائی حکومت نے وزیراعظم سے براہ راست فون پر بات کر کے ملاقات کرانے کی درخواست کی، لیکن تاحال کوئی جواب موصول نہیں ہوا۔ ان کے مطابق جیل سپرنٹنڈنٹ اتنے طاقتور ہیں کہ وہ نہ آئین کو مانتے ہیں اور نہ ہی ہائی کورٹ کے احکامات پر عمل کر رہے ہیں، جو ایک تشویشناک صورتحال ہے۔
تحریک سے متعلق گفتگو کرتے ہوئے شفیع جان نے بتایا کہ اس حوالے سے ذمہ داریاں محمود اچکزئی اور علامہ ناصر عباس کو سونپی گئی ہیں۔ انہوں نے کہا کہ یہ دونوں رہنما جو بھی فیصلہ کریں گے، پارٹی اسے تسلیم کرے گی اور اسی کے مطابق آئندہ لائحہ عمل اختیار کیا جائے گا۔
انہوں نے مزید انکشاف کیا کہ بانیٔ پی ٹی آئی عمران خان کے بیٹوں نے بھی جنوری میں پاکستان آنے کا عندیہ دیا ہے، جس کے بعد سیاسی سرگرمیوں میں مزید تیزی آنے کا امکان ہے۔
