اسلام آباد اور راولپنڈی میں یکساں نظامِ صلوٰۃ کے نفاذ سے متعلق وفاقی وزارتِ مذہبی امور نے اہم فیصلے کر لیے ہیں۔ وزارت کی جانب سے منعقدہ اجلاس میں طے پایا کہ جڑواں شہروں کی تمام مساجد میں ایک ہی وقت پر اذان اور باجماعت نماز ادا کی جائے گی۔
اجلاس میں یہ بھی فیصلہ کیا گیا کہ جلد ہی اذان اور نماز کے اوقات کا باقاعدہ کیلنڈر جاری کر دیا جائے گا، تاکہ دونوں شہروں میں نماز کے اوقات میں مکمل ہم آہنگی پیدا کی جاسکے۔ نماز جمعہ کے خطبات کے موضوعات کے حوالے سے علمائے کرام نے ایک مشترکہ فہرست تیار کرنے پر بھی اتفاق کیا۔
ترجمان وزارتِ مذہبی امور کے مطابق علما نے یکساں اوقاتِ نماز و اذان کے نفاذ اور خطباتِ جمعہ کے موضوعات کے تعین پر مکمل اتفاق رائے کا اظہار کیا ہے۔ خطبات میں اتحادِ امت، اصلاحِ معاشرہ، اور نوجوان نسل کی رہنمائی جیسے موضوعات شامل کیے جائیں گے۔
مزید برآں، مساجد کے انتظام و سکیورٹی سے متعلق مشترکہ سفارشات بھی تیار کی جائیں گی۔ ان سفارشات پر عملدرآمد کی نگرانی وزارت مذہبی امور کرے گی، جبکہ نظامِ صلوٰۃ کو مؤثر بنانے کے لیے قانون سازی کا فیصلہ بھی کیا گیا ہے۔
