چیف جسٹس سرفراز ڈوگر اور جسٹس اعظم خان پر مشتمل دو رکنی بینچ نے کیس کی سماعت کی، سماعت کے دوران کراچی یونیورسٹی کے رجسٹرار عدالت میں پیش ہوئے، تاہم جسٹس طارق جہانگیری پیش نہیں ہوئے۔
دورانِ سماعت رجسٹرار کراچی یونیورسٹی نے ڈگری سے متعلق اصل ریکارڈعدالت میں پیش کیا،جسٹس طارق جہانگیری کے وکیل بیرسٹر صلاح الدین نے مؤقف اختیار کیا کہ عدالت کے سامنے طارق جہانگیری کی تین درخواستیں زیرِ التوا ہیں، پہلے انہیں سنا جائے۔
اس موقع پر میاں داؤد ایڈووکیٹ نے عدالت کو بتایا کہ وہ حلفاً کہتے ہیں کہ جسٹس طارق جہانگیری کے انرولمنٹ فارم بھی بوگس تھے، انہوں نے کہا کہ اگر طارق جہانگیری خود کو بے قصور ثابت کرنا چاہتے ہیں تو ایل ایل بی پارٹ ون اور پارٹ ٹو کی مارکس شیٹس پیش کریں۔
رجسٹرار کراچی یونیورسٹی نے عدالت کو بتایا کہ یونیورسٹی نے حتمی طور پر جسٹس طارق جہانگیری کی ڈگری منسوخ کر دی ہے، پرنسپل اسلامیہ لا کالج کے مطابق طارق محمود جہانگیری ان کے طالب علم ہی نہیں تھے، عدالت کو یہ بھی بتایا گیا کہ طارق جہانگیری نقل کرتے ہوئے پکڑے گئے تھے، جس پر ان فیئر مینز کمیٹی نے نقل کرنے اور امتحان لینے والے کو دھمکیاں دینے کے الزام میں ان پر تین سال کی پابندی عائد کی،رجسٹرار کے مطابق پابندی کے بعد طارق جہانگیری 1992 میں دوبارہ امتحان دینے کے اہل تھے، تاہم انہوں نے ڈگری حاصل کرنے کے لیے جعلی انرولمنٹ فارم استعمال کیا۔
جسٹس طارق جہانگیری کا اسلام آباد ہائیکورٹ کی کارروائی آئینی عدالت میں چیلنج کرنے کا فیصلہ
دوسری جانب جسٹس طارق جہانگیری نے مبینہ جعلی ڈگری کیس میں اسلام آباد ہائی کورٹ کے فیصلے کو وفاقی آئینی عدالت میں چیلنج کر دیا ہے۔ انہوں نے 9 دسمبر کو اسلام آباد ہائی کورٹ کے دو رکنی بینچ کے فیصلے کے خلاف آئینی عدالت میں اپیل دائر کی،درخواست میں مؤقف اختیار کیا گیا کہ اسلام آباد ہائی کورٹ میں دائر رٹ قابلِ سماعت نہیں، لہٰذا ان کے خلاف دائر رٹ کو خارج کیا جائے۔
اسی دوران جسٹس طارق جہانگیری نے ڈگری تنازع کیس میں اسلام آباد ہائی کورٹ میںتین الگ درخواستیں بھی دائر کر دی ہیں، یہ درخواستیں اکرم شیخ اور بیرسٹر صلاح الدین کے ذریعے دائر کی گئیں، جن میں چیف جسٹس سرفراز ڈوگر کے بینچ سے الگ ہونے کی استدعا بھی شامل ہے۔
