اسلام آباد: وفاقی دارالحکومت کے شہریوں کے لیے ایک بڑی سہولت متعارف کرا دی گئی ہے۔ اب گاڑی کے کاغذات ساتھ رکھنے کی پریشانی ختم ہونے جا رہی ہے کیونکہ محکمہ ایکسائز اینڈ ٹیکسیشن اسلام آباد نے ڈیجیٹل کارڈز کے اجرا کا فیصلہ کر لیا ہے۔
محکمہ ایکسائز کے مطابق، نئی پالیسی کے تحت گاڑی کی تمام تفصیلات، چالان کی معلومات اور رجسٹریشن ڈیٹا ایک ڈیجیٹل بُک کی صورت میں مالک کے موبائل والٹ میں محفوظ ہوں گے۔ اس کا مطلب یہ ہے کہ اب گاڑی کی اصل فائل یا کاغذات ساتھ رکھنے کی ضرورت نہیں ہو گی۔
نئے سسٹم کے تحت ڈیجیٹل کارڈز کو اسلام آباد کے ڈیجیٹل پارکنگ پلازوں سے بھی منسلک کر دیا گیا ہے۔ پارکنگ کی فیس بھی ڈیجیٹل کارڈ سے خود بخود ادا کی جا سکے گی، چاہے پاس کیش نہ ہو۔
علاوہ ازیں، گاڑی کی ملکیت کی منتقلی (ٹرانسفر) کا عمل بھی ڈیجیٹل کر دیا جا رہا ہے۔ اب بایومیٹرک تصدیق گھر بیٹھے موبائل فون کے ذریعے ممکن ہو گی۔
ڈائریکٹر ایکسائز بلال اعظم کے مطابق یہ اقدام شہر کو ڈیجیٹل بنانے کی کوششوں کا حصہ ہے۔ ان کا کہنا تھا:
"اب اسلام آباد میں صرف ڈیجیٹل کارڈ ہی قابلِ قبول ہوں گے۔ پرانے کاغذات کا دور ختم ہو چکا ہے۔”
یہ اقدام نہ صرف شہریوں کے لیے آسانی پیدا کرے گا بلکہ جعل سازی، کاغذات کی گمشدگی اور وقت ضائع ہونے جیسے مسائل کا بھی خاتمہ کرے گا۔ اسلام آباد کے بعد یہ نظام دیگر شہروں میں بھی متعارف کرانے پر غور کیا جا رہا ہے۔
