اسلام آباد کے سید پور ماڈل ویلج میں تجاوزات کے خلاف بڑے آپریشن میں 200 غیر قانونی عمارتیں گرادی گئیں، 191 کنال اراضی واگزار۔
اسلام آباد، وفاقی وزیر داخلہ محسن نقوی کی ہدایت پر اسلام آباد کے تاریخی اور سیاحتی مرکز سید پور ماڈل ویلج اور اطراف میں تجاوزات اور غیر قانونی تعمیرات کے خلاف بڑے پیمانے پر آپریشن جاری ہے،آپریشن کے دوران اب تک دو سو غیر قانونی تعمیرات کو مسمار کیا جا چکا ہے جبکہ نیشنل پارک کی ایک سو اکیانوے کنال اراضی قابضین سے واگزار کرالی گئی ہے۔
حکام کے مطابق برسوں سے کرایہ ادا نہ کرنے والے افراد سے عمارتیں بھی خالی کرالی گئی ہیں اور 2005 کے بعد قائم کی گئی تمام غیر قانونی تعمیرات کے خلاف بلاامتیاز کارروائی کی جا رہی ہے، جس میں سیٹلائٹ امیجری کے ذریعے نشاندہی کی جارہی ہے۔ وزیر داخلہ محسن نقوی نے سید پور ویلج کا دورہ کرکے آپریشن کا جائزہ لیا اور سی ڈی اے حکام کی کارکردگی کو سراہا۔ ان کا کہنا تھا کہ غیر قانونی تعمیرات کے خلاف بلا تفریق کارروائی جاری رکھی جائے گی اور خالی کرائی گئی عمارتوں کو شفاف طریقے سے نیلام کیا جائے گا۔
انہوں نے اعلان کیا کہ سید پور ویلج کی اپ گریڈیشن اور بیوٹیفیکیشن اسلام آباد کی خوبصورتی میں اضافہ کرے گی اور یہاں ایک عالمی معیار کا تفریحی اور کمرشل مرکز قائم کیا جائے گا، جہاں کراچی اور لاہور کے معروف ریسٹورنٹس کو بھی لایا جائے گا تاکہ سیاحوں کو معیاری سہولیات میسر آئیں، اس موقع پر وزیر داخلہ کو چیئرمین سی ڈی اے محمد علی رندھاوا نے منصوبے کے تحت جاری ترقیاتی کاموں پر تفصیلی بریفنگ دی جبکہ سی ڈی اے ممبران، اے ڈی سی جی اور ایس ایس پی آپریشنز سمیت دیگر حکام بھی موجود تھے۔
یاد رہے کہ سید پور ماڈل ویلج اسلام آباد کے قدیم ترین دیہات میں شمار ہوتا ہے جسے 2006 میں سیاحتی مقام کے طور پر اپ گریڈ کیا گیا تھا اور یہاں متعدد ریسٹورنٹس اور گیلریز قائم کی گئی تھیں۔
