وزیر داخلہ محسن نقوی نے اسلام آباد میں تجاوزات کے خاتمے اور غیر قانونی مکینوں کے خلاف آپریشن کا حکم دیا، ٹی چوک فلائی اوور اور شاہین چوک انڈر پاس کا سنگ بنیاد بھی ستمبر میں رکھا جائے گا۔
اسلام آباد: وزیر داخلہ محسن نقوی نے اسلام آباد میں تجاوزات کے مکمل خاتمے کا حکم دیتے ہوئے واضح کیا ہے کہ اس حوالے سے کسی کے ساتھ کوئی نرمی نہیں برتی جائے گی۔
اسلام آباد میں سی ڈی اے ہیڈکوارٹرز میں اجلاس کی صدارت کرتے ہوئے محسن نقوی نے کہا کہ 30 ستمبر تک تمام غیر قانونی مکینوں کے خلاف آپریشن مکمل کر کے متعلقہ سیکٹرز کو کلیئر کیا جائے۔ وزیر داخلہ نے مزید ہدایت دی کہ تجاوزات بنانے والوں کے خلاف سخت کارروائی کی جائے تاکہ عوام کو سہولت میسر ہو۔
اجلاس میں ڈپلومیٹک انکلیو اپگریڈیشن پراجیکٹ کے فیز ون پر فوری کام شروع کرنے کی منظوری دی گئی۔ اسی طرح فیصلہ کیا گیا کہ اسلام آباد کے ٹی چوک پر فلائی اوور اور شاہین چوک پر انڈر پاس کا سنگ بنیاد ستمبر کے آغاز میں رکھا جائے گا۔
محسن نقوی نے کہا کہ اسلام آباد کے جاری اور نئے ترقیاتی منصوبے شہریوں کی سہولت کے لیے ہیں، ان منصوبوں کی بروقت تکمیل حکومت کی اولین ترجیح ہے۔
